“Madamo sing Ginahimo sa Buluhaton sang Ginuo”
1 Masako gid ang aton iskedyul sa teokratikong mga hilikuton sa Abril kag Mayo! Sa Abril 14 saulugon naton ang Memoryal sang kamatayon ni Cristo. Madamong tawo ang dapat palig-unon sa pagtambong sa sinang importante nga okasyon: mga kakilala sa negosyo, mga ditumuluo nga mga himata, mga kabutho, mga bag-ong interesado, kag mga estudyante sa Biblia. Listaha yadtong ginaplano mo nga agdahon agod wala sing isa nga malipatan.
2 Pagkadason nga semana palig-unon naton ang tanan nga nagtambong sa Memoryal nga mamati sa pinasahi nga pamulongpulong publiko sa Abril 23, sa tema “Ang Katapusan sang Butig nga Relihion Malapit Na.” Ginalauman nga madamong interesado nga makapamati sa sining tampad nga mensahe ang maluyag makig-upod sa kongregasyon sing tayuyon, indi lamang sa pinasahi nga mga okasyon.
3 Ipaguwa ang Pinasahi nga Kingdom News: Ang talalupangdon nga butang sa miting sa Abril 23 amo ang pagpaguwa sa suno-sa-tion nga apat-ka-pahina nga Kingdom News nga ipanagtag sing lapnag tubtob sa Mayo 14. Wala ka bala nagaugyon nga “madamo sing ginahimo sa buluhaton sang Ginuo” sa sining panag-on sang Memoryal?—1 Cor. 15:58.
4 Ang tagsa ka kongregasyon pagapadalhan sing suplay sang mga Kingdom News. Ang mga kahon nga nagaunod sing Kingdom News dapat taguon sa maayo nga lugar kag indi dapat buksan tubtob matapos ang programa sa Abril 23. Sa sina nga tion ang Kingdom News ipaguwa sa mga kauturan kag sa publiko. Pagkatapos sang mga miting sa kongregasyon, mga programa sa mga sirkito nga asambleya, ukon special assembly day sa Abri! 23, ang mga nagtambong makabaton sing isa ka kopya agod mabasa nila ini sing maayo kag masangkapan para sa pagpanagtag sini.
5 Ang mga Gulang Madamo sing Hilimuon: Temprano pa sini nga bulan ang hubon sang mga gulang magasapol agod hambalan ang mga detalye sang pinasahi nga kampanya. Ang mga kongregasyon dapat manikasog nga matuptupan ang tanan nga teritoryo nga gintangdo sa ila. Antes matapos ang kampanya, panikasugi sing pinasahi nga pangabudlayan ang mga teritoryo nga wala matuptupan sa nagligad nga anom ka bulan. Bangod sang pagkaimportante sang hilikuton, walay duhaduha nga madamo ang magapalista subong mga auxiliary payunir. Madamong estudyante sa Biblia ang magabuylog man sa aton subong bag-ong dibawtismado nga mga manugbantala. Isa gid ini ka makalilipay nga tion samtang nagapangabudlay kita sing tingob sa buluhaton sang Ginuo!
6 Ang mga konduktor sa Pagtinuon sa Libro sang Kongregasyon dapat maghimo sing pat-od nga mga kahimusan para sa grupo nga pagpanaksi sa tunga-tunga sang semana kag sa mga Sabado kag sa mga Domingo. Dugang pa, ang pagpanaksi sa gab-i dapat man iskedyulon sa dimagkubos makaisa sa isa ka semana sa tion sang kampanya.
7 Ang mga miting antes magguwa sa latagon dapat iskedyulon agod ang mga manugbantala kag mga payunir makasugod sing temprano sa ministeryo kada adlaw. Ining mga miting dapat mangin malip-ot lamang. Ang tagsa magahatag sing simple nga presentasyon sa Kingdom News. Ang mga manugbantala dapat man magdala sing bag-o nga mga guwa sang magasin agod mapahamtang kon nagapakita sing interes. Ang mga miting sa hapon antes mag-alagad sa latagon mahimo magalakip sang isa ukon duha ka panugda para sa mga pagduaw liwat sa sadtong nagbaton sang Kingdom News. Apang, mahimo pakamaayuhon sang iban nga mga manugbantala ang magpanagtag sa aga kag hapon. Para sa sina nga katuyuan, luyag pat-uron sang manugtatap sa pag-alagad nga may yara bastante nga teritoryo. Ang ngalan kag direksion sang tanan nga nagpakita sing interes dapat isulat sa house-to-house record.
8 Kon ang isa ka kongregasyon nagabulig sa iban sa pagtuptop sang ila teritoryo, ang mga ngalan kag mga direksion sang mga interesado dapat ihatag sa kongregasyon nga nagauyat sang teritoryo.
9 Mga ginikanan, nagauswag bala ang inyo mga anak agod mangin dibawtismado nga mga manugbantala? Napanilagan na nga sa pila ka mga kongregasyon, ang iban nga mga kabataan tinuig na nga ginaupdan sang ila dedikado nga mga ginikanan sa ministeryo, kag ang kabataan aktibo, bisan nga indi pa sila mga manugbantala. Dapat binagbinagon sang mga ginikanan kon bala ang ila kabataan kalipikado na para sa sini nga pribilehiyo. Sarang mahambalan sang duha ka gulang ang tanan nga butang upod sa ulo sang pamilya kag pat-uron kon bala ang bata mahimo na maisip subong isa ka dibawtismado nga manugbantala.—om p. 99-100.
10 May manugbantala bala sa teritoryo sang inyo kongregasyon nga indi na aktibo sa pagdulot sing halad sang pagdayaw kay Jehova? (Heb. 13:15) Ang iban nga diaktibo mahimo nga nadaug sang mga pagluya sing buot ukon sang mga kabalaka sa kabuhi, bisan pa padayon nga nagasunod sa mga talaksan sa moral sang Biblia. Ang mainabyanon nga pagduaw sang isa sa mga gulang mahimo magapahulag sa ila sa pagpakig-upod liwat sing tayuyon sa kongregasyon kag, sa nagakaigo nga tion, sa pagpakigbahin liwat sa ministeryo.
11 Ang Tanan nga Kalipikado Mahimo Makigbahin sa Sining Makalilipay nga Hilikuton: Nabudlayan bala ang iban sang imo mga anak ukon mga tin-edyer sa pagpakigbahin sa balay-balay nga ministeryo? Kamusta kamo nga mga bag-uhan nga limitado pa ang eksperiensia sa pag-alagad sa latagon? Masapwan ninyo ining pinasahi nga hilikuton sa Kingdom News nga makalilipay katama! Isa lamang ka simple nga presentasyon ang kinahanglanon.
Mahimo ka makasiling sing kaangay sini:
◼ “Sini nga bulan nagapanagtag kami sing isa ka importante nga mensahe sa 232 ka kadutaan sa palibot sang kalibutan. Ang mensahe importante bangod nagahatag ini sa aton sing malig-on nga mga rason sa pagpati nga may solusyon sa mga problema nga ginaatubang naton karon. Luyag mo bala makatigayon sing personal nga kopya?”
Ukon mahimo nimo tilawan ini:
◼ “Sini nga bulan halos lima ka milyon ka boluntaryo ang nagapanagtag sining importante nga mensahe sa madamo nga hambal. Ginhanda ini para sa mga tawo nga luyag makita ang katapusan sang mga problema nga ginaatubang naton karon. Yari ang imo personal nga kopya.”
Ining simple nga presentasyon mahimo nga nagakabagay sa imo:
◼ “Ginapalig-on namon ang tanan nga basahon ining importante nga mensahe nga natig-uluhan [basaha ang titulo sang Kingdom News.] Talupangda ang ginasiling sini diri sa pahina 2 nahanungod sa nagadugang nga mga problema tuhoy sa . . . [basaha ang pinili nga dinalan gikan sa Kingdom News.] Napat-od namon nga maluyagan mo ang pagbasa sang kabug-usan sining suno-sa-tion nga mensahe. Yari ang imo kopya.”
12 Mangin interesado sing personal sa kada isa nga nagabaton sing Kingdom News. Luyag naton pat-uron nga ang tanan sadtong nagpakita sing interes ginhatagan sing isa ka personal nga kopya. Kon ang balay wala sing tawo, isulat ini sa imo house-to-nouse record agod mabalikan mo ini sa ulihi kag matanyagan sing Kingdom News ang tagbalay. Ining Kingdom News nga tract mahimo gamiton sa pagpanaksi sa dalan kon ang isa ka tawo nagapakita sing interes, apang indi ini dapat ipanagtag sing pataka nga daw mga handbill. Sa baylo, palapiti ang nagalabay, kag ipaathag ang importansia sang mensahe nga ginaunod. Gamita ang Kingdom News sa dipormal nga pagpanaksi, samtang nagalakbay, ukon kon nagapanaksi sa mga kaupdanan sa trabaho kon tigpalanyaga. Ang mga nagamasakit ukon mga maluya sing lawas mahimo makatanyag sini sa mga bisita, mga doktor kag mga nars, mga ahente, kag sa iban pa nga nagakadto sa ila balay.
13 Pila ka pagduaw liwat ang himuon mo sa tion sang kampanya? Wala sing duhaduha nga madamo gid, kay ang tanan nga nagpakita sing interes sa Kingdom News dapat duawon liwat. Sa una nga pagduaw, labing maayo nga gamiton lamang ang Kingdom News. Nian, sa pagbalik mo, maghatag sing pila ka komento nahanungod sa pagkanahisuno-sa-tion sang mensahe sang Kingdom News. Mamati sing maayo samtang ginapabutyag sang tagbalay ang iya opinyon sa kon ano ang iya nabasa. Ang iya mga komento magabulig sa imo sa paghibalo kon ano ang itanyag sa pinakaulihi nga mga magasin kag ayhan kon paano maghanda para sa dugang pa nga mga paghambalanay. Kon makatigayon ka sing maayo nga sabat sa mga pagduaw liwat, tilawi nga makasugod sing pagtuon sa Biblia.—1 Cor. 3:6, 7.
14 “Ang Inyo Pagpangabudlay Indi Walay Pulos”: Takus gid bala ining tanan nga buluhaton? Ginpasalig ni Pablo ang mga taga-Corinto: “Ang inyo pagpangabudlay indi walay pulos sa Ginuo.” (1 Cor. 15:58) Sa sulod sang mga tinuig, ang aton mga panikasog sa pagpanagtag sing mga Kingdom News ginpakamaayo sing daku. Ang isa ka mag-asawa nga nagsaylo sa walay unod nga apartment nakakita sing daan nga kopya sang Kingdom News sa drawer. Amo lamang ini ang nabilin sa bug-os nga apartment. Sa tapos ini mabasa, ginpakig-angutan nila ang lokal nga kongregasyon kag nangabay sing isa ka pagtuon sa Biblia. Nagsugod sila sa pagtambong sa tanan nga mga miting kag nagpabutyag sang ulihi sang handum nga magpabawtismo. Ayhan ang isa ka kopya nga ibilin mo magahatag sing kaanggid nga mga resulta!
15 May yara kita daku nga hilikuton sa unahan naton. Ang aton tulumuron amo nga matuptupan sang tagsa ka kongregasyon ang iya teritoryo sa Mayo 14 ukon sa katapusan sang bulan kon kinahanglan nga palawigon ang tion para sa pagpanagtag sing Kingdom News. May suplay nga ginpadala agod nga sa mga kongregasyon sa siudad ukon sa mga may madamo nga teritoryo, ang tagsa ka regular payunir mahimo makabaton sing mga 250 ka kopya sang Kingdom News kag ang tagsa ka manugbantala sa kongregasyon makatigayon sing mga 50 ka kopya. Ang mga kongregasyon nga may mas magamay nga mga teritoryo magabaton sing katunga sang kadamuon sa ibabaw. Ang kwenta sang kongregasyon pagasukton sing 20 ka sentimos para sa tagsa ka kopya sang Kingdom News, gani yadtong nagakuha sang ila suplay magaamot sini nga kantidad agod mabayaran ang bili. Kon bangod sang daku nga teritoryo indi matuptupan sang iban nga mga kongregasyon ang ila teritoryo sa tungatunga sang Mayo kag may nabilin pa gihapon nga mga kopya, ayhan praktikal nga agdahon ang kaingod nga mga kongregasyon sa pagbulig. Sa iban nga mga kongregasyon, ang kinahanglanon mahimo mapun-an sing lokal kon dugangan sang mga manugbantala ang ila pagpanghikot paagi sa pagpalista subong mga auxiliary payunir ukon paagi sa pagpakigbahin sa ministeryo sing mas masunson.
16 Ang bug-os kalag nga debosyon kay Jehova ginakinahanglan agod matuman naton ang aton buluhaton. (Col. 3:23) Nadalahig ang kabuhi. Indi mapasapayanan sang mga tawo ang kahulugan sang mga kahimtangan sa kalibutan karon. Ang tion malip-ot na lang. Dapat nila atubangon ang katunayan nga ang tawo wala sing solusyon sa mga problema sining kalibutan. Ang Dios lamang amo ang may solusyon. Yadtong maluyag nga matigayon ang kahamuot sang Dios dapat magpanghikot sing desidido, nga wala sing pagpalantang, nahisuno sa iya mga kinahanglanon.
17 Pagkatapos sang pinasahi nga kampanya sa Mayo 14, magahinay bala kita sa aton hilikuton? Indi! Padayon kita nga magasako nahisuno sa inspirado nga laygay ni Pablo.