Ang Espiritu sa Pagboluntaryo Nagadala sing mga Pagpakamaayo
1. Paano ginpakita nanday David kag Nehemias ang espiritu sa pagboluntaryo?
1 Sang ginyaguta ni Goliat ang mga hangaway sang Israel, mahimo kuntani sia batuan sang bisan sin-o nga soldado. Apang isa iya ka bakero nga pamatan-on, nga wala nahanas sa pagpakig-away, ang nagboluntaryo. (1 Sam. 17:32) Sang nagpauli ang gintapok nga mga Judiyo sa Jerusalem kag napaslawan sa pagpatindog liwat sang mga pader, ang manugtagay iya sang hari sang Persia ang nagboluntaryo nga biyaan ang iya katungdanan sa palasyo kag nagbiyahe pa Jerusalem agod nga organisahon ang hilikuton. (Neh. 2:5) Ginpakamaayo ni Jehova ining duha ka lalaki, sanday David kag Nehemias, bangod sa panimuot nga ila ginpakita.—1 Sam. 17:45, 50; Neh. 6:15, 16.
2. Ngaa dapat ipasundayag sang mga Cristiano ang espiritu sa pagboluntaryo?
2 Karon, ang espiritu sa pagboluntaryo wala sa kalibutan. Sa sining “katapusan nga mga adlaw,” masako gid ang mga tawo, kag madamo ang “mga mahigugmaon sa kaugalingon.” (2 Tim. 3:1, 2) Mahapos lang sa isa ka tawo nga mabuyo sa iya personal nga mga intereses amo nga mawasi niya ang mga kahigayunan nga magtanyag sing bulig sa mga nagakinahanglan. Apang, subong mga Cristiano, luyag gid naton ilugon si Jesus, nga nagpangita sing mga kahigayunan agod buligan ang iban. (Juan 5:5-9; 13:12-15; 1 Ped. 2:21) Paano naton mapasundayag ang espiritu sa pagboluntaryo, kag ano ang mga pagpakamaayo sini sa aton?
3. Ano ang mabulig sang espiritu sa pagboluntaryo sa mga miting sa kongregasyon?
3 Para sa Aton mga Kauturan: Mahimo naton mapaambit ang “espirituwal nga dulot” sa iban paagi sa boluntaryo nga pagkomento sa mga bahin sang miting nga may partisipasyon sang tumalambong. (Roma 1:11) Ang pagkomento nagapadungog kay Jehova, nagapatudok gid sang kamatuoran sa aton hunahuna kag tagipusuon, kag nagadugang sang aton kalipay sa mga miting. (Sal. 26:12) Mahimo man kita magboluntaryo sa paghatag sing bahin sa Teokratikong Eskwelahan Para sa Ministeryo kon nagakinahanglan sing tal-us. Makabulig ini sa aton agod mag-uswag sa aton kalantip sa pagpanudlo.
4. Ano ang iban nga paagi nga mapasundayag naton ang espiritu sa pagboluntaryo?
4 Mahimo mapakita sang mga utod nga lalaki ang espiritu sa pagboluntaryo paagi sa paglab-ot sang kalipikasyon sa pagtatap sang mga katungdanan sa kongregasyon. (Isa. 32:2; 1 Tim. 3:1) Ang tanan mahimo makabulig agod mangin madinalag-on ang mga asambleya kag mga kombension paagi sa pagboluntaryo sa nanuhaytuhay nga departamento. Kon magboluntaryo kita nga mag-upod sa manugtatap sang sirkito sa ministeryo ukon mag-aman sang pagkaon para sa iya, magaresulta ini sang “pagbayluhanay sing pagpalig-on.” (Roma 1:12) Kon magtanyag kita sing praktikal nga bulig sa mga ilo, mga balo, mga masakiton kag maluya, mga iloy nga may magagmay nga mga bata, kag sa iban pa sa kongregasyon, mangin malipayon gid kita kag kahamut-an ni Jehova.—Hulu. 19:17; Binu. 20:35.
5. Anong mga hilikuton may kaangtanan sa Kingdom Hall ang nagakinahanglan sing handa nga mga boluntaryo?
5 Ang isa pa ka paagi nga makaboluntaryo kita sang aton tion kag panikasog amo ang pagbulig sa pagpaninlo kag pagmentinar sang Kingdom Hall. Dugang pa, bangod madamo nga tawo ang nagasulod sa kamatuoran, nagadamo ang panginahanglan sang bag-ong mga Kingdom Hall kag mga boluntaryo sa pagpatindog sini. Ang isa ka mag-asawa nagboluntaryo sa pagbulig sa lokal nga Regional Building Committee bisan pa nga wala sila sing kalantip sa pagpanukod. Sang ulihi, ginhanas ang mag-asawa kag karon nagabulig na sa pag-asintar sang mga tisa. Nagsiling ang asawa: “Ang pagbinuligay sa hilikuton upod sa iban nagpasuod gid sang amon mga pag-abyanay. Sa tapos sang obra, lapyo gid kami sa pisikal apang mapagsik gihapon sa espirituwal.”
6. Ngaa ang ministeryo amo ang labing importante nga pagboluntaryo nga aton mahimo?
6 Sa Pagbantala: Ang labing importante nga pagboluntaryo nga aton mahimo karon amo ang pagbantala sing Ginharian. Samtang ginabuligan ang mga tawo nga mahangpan kag maaplikar ang laygay sang Biblia, makatigayon sila sing katuyuan sa kabuhi kag sing kabakod agod malandas ang malain nga mga batasan. Matun-an nila sa Biblia ang makapapagsik nga paglaum sa palaabuton. Paagi sa pagtudlo sa ila sa Biblia, ginapakita naton ang malipayon nga pagboluntaryo nga may nagapadayon nga mga kaayuhan. (Juan 17:3; 1 Tim. 4:16) Ayhan ang aton mga kahimtangan magatugot sa aton nga makapakigbahin sing kapin sa sini nga hilikuton paagi sa pag-auxiliary ukon pagregular payunir, paagi sa pagsaylo sa mga duog nga may mas daku nga panginahanglan ukon pagtuon sing tuhay nga lenguahe.
7. Ngaa ang pagboluntaryo ilabi na nga importante karon?
7 Nagtagna si Hari David nga sa pagsugod sang paggahom sang Mesias, ang katawhan sang Dios “magahalad sang ila kaugalingon sing kinabubut-on.” (Sal. 110:3) Paagi sa pagpadasig ni Jehova sa katapusan nga espirituwal nga pagpangani, madamo pa sing mga hilikuton nga mahimo naton maboluntaryuhan. (Isa. 60:22) Nagsiling ka na bala: “Yari ako! Ipadala ako”? (Isa. 6:8) Sa pagkamatuod, paagi sa aton pagpakita sang espiritu sa pagboluntaryo, ginapahamut-an naton si Jehova kag makatigayon kita sing bugana nga padya.