Ginapabaloran Naton ang Aton mga Pribilehiyo!
1 Sa bug-os nga pagluntad sang tawo, ginhatagan ni Jehova sing nanuhaytuhay nga pribilehiyo ang iya mga alagad. Lalaki man ukon babayi, bata man ukon tigulang, imol man ukon manggaranon, tanan sila ginhatagan niya sing pribilehiyo. (Luc. 1:41, 42; Binu. 7:46; Fil. 1:29) Ano nga mga pribilehiyo ang iya ginahatag sa aton karon?
2 Ang Pila sang Aton mga Pribilehiyo: May pribilehiyo kita nga matudluan ni Jehova. (Mat. 13:11, 15) Pribilehiyo man naton nga madayaw si Jehova paagi sa pagkomento sa tion sang mga miting sa kongregasyon. (Sal. 35:18) Kon tuksuon kita nga magkomento, ginahimo naton ini nga may kapagsik. Sing kaanggid, kon ginatamod naton ang mga asaynment sa kongregasyon subong pribilehiyo, himuon naton ini sa bug-os naton nga masarangan. Pirme bala kita nagapakigbahin sa aton pribilehiyo nga maninlo kag magmentinar sang Kingdom Hall?
3 Bisan pa minilyon ang nagapangduhaduha kon bala ginapamatian sang Dios ang ila mga pangamuyo, may pinasahi kita nga pribilehiyo bangod ginapamatian sang Labing Gamhanan nga Persona sa uniberso ang aton mga pangamuyo. (Hulu. 15:29) Si Jehova gid mismo ang nagapamati sang mga pangamuyo sang iya mga alagad. (1 Ped. 3:12) Ginatugutan niya kita nga makapalapit sa iya sa tanan nga tion. Isa gid ka hamili nga dulot sa aton nga makapangamuyo “sa tanan nga tion”!—Efe. 6:18.
4 ‘Masigkamanugpangabudlay Upod sa Dios’: Ang isa sa aton pinakahamili nga pribilehiyo amo ang pagbantala sang maayong balita sang Ginharian sang Dios subong “masigkamanugpangabudlay [upod] sa Dios.” (1 Cor. 3:9) Isa ini ka hilikuton nga nagapahalipay kag nagapaumpaw sa aton. (Juan 4:34) Matuman ni Jehova ang iya hilikuton bisan wala ang bulig sang tawo, apang bangod sang iya gugma, ginhatag niya ini nga pribilehiyo sa aton. (Luc. 19:39, 40) Apang wala ginhatag ni Jehova ini nga pribilehiyo sa kay bisan sin-o. Ang mga nagapakigbahin sa pagbantala dapat nga makalab-ot kag makasunod sa mga kalipikasyon nga ginapatuman sang Biblia. (Isa. 52:11) Ginapabaloran bala naton ini nga pribilehiyo paagi sa pagkabig sa aton ministeryo nga importante gid nga bahin sang aton hilikuton kada semana?
5 Nangin malipayon kita bangod sang mga pribilehiyo nga ginhatag ni Jehova sa aton. (Hulu. 10:22) Indi gid ini pagpatumbayai! Kon ginapakita naton nga ginapabaloran gid naton ang aton mga pribilehiyo sa pag-alagad, mapahamut-an naton ang aton langitnon nga Amay, nga amo ang ginahalinan sang ‘tagsa ka maayong hatag kag tagsa ka dolot nga himpit.’—Sant. 1:17.