Sulat sang Nagadumala nga Hubon

Palangga nga mga Masigkamanugbantala sang Maayong Balita:

Isa gid ka makalilipay nga pribilehiyo nga mahiusa kita sa pagsimba sa lamang matuod nga Dios, si Jehova! Kita mga “masigkamanugpangabudlay” niya, nga gintugyanan sang sagrado kag nagaluwas sang kabuhi nga hilikuton nga pagbantala kag pagtudlo sang maayong balita parte sa iya natukod nga Ginharian. (1 Cor. 3:9; Mat. 28:19, 20) Agod matuman ining bug-os kalibutan nga hilikuton sing mahim-ong kag nahiusa, dapat nga naorganisar kita sing maayo.—1 Cor. 14:40.

Ini nga libro magabulig sa imo nga mahangpan kon paano nagapanghikot karon ang Cristianong kongregasyon. Nagahinun-anon ini parte sa imo mga pribilehiyo kag katungdanan subong isa ka Saksi ni Jehova. Kon ginapabaloran mo ang imo mga pribilehiyo kag ginatuman ang imo mga katungdanan, ‘magalig-on ang imo pagtuo.’—Binu. 16:4, 5; Gal. 6:5.

Gani, ginapalig-on ka namon nga tun-an sing maayo ini nga libro. Mangita sing paagi nga maaplikar mo sa imo kabuhi ang mga impormasyon diri. Halimbawa, kon ikaw bag-o lang nangin di-bawtismado nga manugbantala, ano pa ang dapat mo himuon agod mangin isa ka bawtismado nga Saksi ni Jehova? Kon bawtismado ka na, ano ang mahimo mo agod mag-uswag sa espirituwal kag mapasangkad ang imo pag-alagad kay Jehova? (1 Tim. 4:15) Paano ka makaamot sa paghidait sang kongregasyon? (2 Cor. 13:11) Pangitaa ang mga sabat sa sini nga mga pamangkot sa sini nga libro.

Kon ikaw isa ka bawtismado nga lalaki, ano ang himuon mo agod mangin kalipikado subong ministeryal nga alagad kag gulang sa ulihi? Bangod linibo ka bag-uhan ang padayon nga nagasulod sa organisasyon sang Dios, kinahanglan gid ang kalipikado nga mga utod nga lalaki agod magpanguna. Ini nga libro magabulig sa imo nga mahibaluan kon ano ang nadalahig sa ‘pagtinguha’ sining espirituwal nga mga tulumuron.—1 Tim. 3:1.

Hanuot kami nga nagapangamuyo nga ini nga libro magabulig sa imo nga makita ang imo duog sa kahimusan ni Jehova kag pakabahandion ini. Ginahigugma gid namon kamo tanan kag padayon namon nga ginapangamuyo nga malakip kamo sa mga magakalipay sing dayon sa pagsimba sa aton langitnon nga Amay, si Jehova.—Sal. 37:10, 11; Isa. 65:21-25.