Sunda ang Halimbawa ni Jesus
1. Ano nga halimbawa ang ginpahamtang ni Jesus?
1 Kon ginabuligan naton ang iban nga mangin alagad sang Dios, dumdumon naton pirme nga ang aton halimbawa may daku nga epekto sa mga nagapanilag sa aton. Nagpanudlo si Jesus paagi sa pulong kag buhat. Ang iya kakugi, gugma sa mga tawo, determinasyon nga himayaon kag tumanon ang iya Amay nagpalig-on gid sa mga nagaupod sa iya.—1 Ped. 2:21.
2. Sa ano nga mga paagi makaimpluwensia ang aton halimbawa sa aton mga kauturan?
2 Sa Pamalaybalay nga Ministeryo: Kaangay ni Jesus, ang aton halimbawa nagaimpluwensia man sa aton mga kauturan. Ang mga manugbantala nga bag-uhan kag di-eksperiensiado mahimo nga mapahulag nga pauswagon ang kalidad sang ila ministeryo kon makita nila ang aton makugi nga pagbantala. Kon makita nila ang aton kalipay kag tunay nga interes sa iban, magapahanumdom ini sa ila nga dapat man nila ipakita ang subong sini nga mga kinaiya sa ila ministeryo. Kon matalupangdan nila ang aton lantip nga paggamit sang Biblia, maukod nga pagbalik duaw kag pagdumala sing mga pagtuon sa Biblia, mapahulag man sila nga ilugon ini.
3. Paano kita makapahamtang sing maayong halimbawa sa aton ginadumalahan sing pagtuon sa Biblia?
3 Kon Nagadumala sing mga Pagtuon sa Biblia: Ang aton mga estudyante sa Biblia amo ang labi na nga makaobserbar sang aton paggawi. Halimbawa, bisan pa ginapaathag naton sa ila ang importansia sang paghanda, pagpangita sing teksto, ukon pagkurit sing yabi nga mga punto, maobserbahan nila kon bala ginahandaan gid naton ini. (Roma 2:21) Kon nagaabot kita sa husto nga oras sa tion sang pagtuon, mahimo nga indi man nila pagtugutan ang iban nga hilikuton nga mag-upang sa pagtuon nila sing Biblia. Walay duhaduha nga mapanilagan man nila ang aton kahanda sa pagministeryo kag mabakod nga pagtuo. Indi makapakibot kon ngaa nangin mabungahon nga mga manugbantala ang mga estudyante sang mga nagasunod gid sa halimbawa ni Jesus.
4. Kon nagatambong sa mga miting sang kongregasyon, paano kita makapahamtang sing maayo nga halimbawa?
4 Kon Nagatambong sa mga Miting: Ang tanan nga miembro sang kongregasyon mahimo makatudlo paagi sa ila halimbawa sa tion sang mga miting. Ang mga interesado nga nagasugod pa lang sa pagtambong makabenepisyo gikan sa mga halimbawa nga ila nakita sa kongregasyon. Matalupangdan nila ang aton mapinalanggaon nga paghiliutod, Cristianong paghiusa, kag maugdang nga pamayo kag pamustura. (Sal. 133:1) Maobserbahan man nila ang aton halimbawa sa tayuyon nga pagtambong kag pagkomento sa tion sang mga miting. Ang isa ka bisita nga nagtambong nakatalupangod kon daw ano lang kahapos nga nakit-an sang diutay nga bata nga babayi ang teksto sa iya kaugalingon nga Biblia kag kon paano niya ginasundan sing maayo ang pagbasa sang teksto. Ang halimbawa sang bata nagpahulag sa iya nga magpangabay sing pagtuon sa Biblia.
5. Ngaa indi gid naton pagpakadiutayon ang balor sang aton maayo nga halimbawa?
5 Ang Kasulatan nagapalig-on sa aton nga ilugon ang maayong halimbawa sang kada isa. (Fil. 3:17; Heb. 13:7) Busa, kon pirme naton ginasunod ang halimbawa ni Jesus, dapat naton dumdumon nga ginapanilagan ini sang iban kag may maayo ini nga impluwensia sa ila. Bangod sini, kabay nga sundon gid naton ang mga pinamulong sang 1 Timoteo 4:16 nga nagasiling: “Andami ang imo kaugalingon kag ang imo pagpanudlo.”