Pinasahi nga Gua sang Magmata! nga Itanyag sa Nobiembre!
1 Madamo nga tawo ang may serioso nga mga pamangkot tuhoy sa kapuslanan sang Biblia. Kon mga tawo ang nagsulat sini, ngaa ginatawag ini nga Pulong sang Dios? Ngaa masaligan ko ini sa pagtuytoy sa akon mga tikang? Kon hatagan ko sing tion nga basahon kag pamalandungan ang Biblia, ano ang makuha ko? Ano nga badbad sang Biblia ang dapat ko gamiton? Amo sini ang pila ka pamangkot nga pagasabton sa pinasahi nga gua sang Magmata! sa Nobiembre nga natig-uluhan, “Masaligan Mo Bala ang Biblia?”
2 Ipanagtag naton sing lapnag ining pinasahi nga gua sang Magmata! sa aton teritoryo. Kon posible, magpamalaybalay ka upod sa kongregasyon sa tanan nga Sabado sang Nobiembre. Itanyag sa imo mga paryente, kaingod, katrabaho, maestra ukon maestro, kabutho, kag mga ginaduaw liwat ining gua sang Magmata! Magdala ka sing mga kopya sini kon nagapamalaklon ka ukon nagalakbay. Ginpalig-on na ang mga gulang nga mag-order sing dugang nga mga kopya agod may bastante nga suplay ang kongregasyon.
3 Sugdi ang Pagtuon sa Biblia: Kon makapahamtang ka sining magasin, ihanda ang tagbalay para sa pagtuon sa Biblia antes mo hinakpan ang inyo pagsugilanunay. Halimbawa, puede mo ihambal, “Pagbalik ko, luyag ko ipakita sa imo kon ano ang sabat sang Biblia sa pamangkot nga, ‘Ano ang katuyuan sang Dios para sa duta?’” Nian, pagbalik mo, magdala ka sing Ginatudlo Sang Biblia nga libro kag ipakita sa tagbalay ang pahina 4-5, ukon binagbinaga ang parapo 1-3 sang kapitulo 3. Ari ang isa pa nga puede mo isiling, “Pagbalik ko, luyag ko hinun-anunan upod sa imo ang isa ka tagna sa Biblia nga nagakatuman na karon.” Nian, pagbalik mo, ipakita sa tagbalay ang kapitulo 9 sang libro kag hinun-anuni ninyo ang parapo 1-3. Ukon puede mo man isiling sa tagbalay: “Madamo ang nabudlayan sa paghangop sang ila ginabasa sa Biblia. Pagbalik ko, luyag ko ipakita sa imo kon paano mo mas madali mahangpan ang Biblia.” Sa imo pagduaw liwat, ipakita sa iya ang Ginatudlo Sang Biblia nga libro, kag ipasundayag ang isa ka pagtuon.
4 Ang Biblia amo lamang ang nagaunod sing “balaan nga mga kasulatan” nga “makapaalam sa [aton para] sa kaluwasan.” (2 Tim. 3:15) Busa, kabay nga makigbahin kita sing makugihon sa pagpanagtag sining pinasahi nga gua sang Magmata! agod mapabakod ang pagsalig sang mga tawo sa Biblia!