Isa ka Pagbayluhanay sing Pagpalig-on Para sa Tanan
1. Anong pinasahi nga mga kahigayunan ang mahatag sang mga duaw sang mga nagalakbay nga manugtatap?
1 Nagsulat si apostol Pablo sa kongregasyon sa Roma: “Nagahandum ako nga makita kamo, agod mapaambit ko sa inyo ang espirituwal nga dulot agod mapalig-on kamo; ukon, indi gani, agod may pagbayluhanay sing pagpalig-on sa tunga ninyo, sa kada isa paagi sa pagtuo sang isa, ang inyo pagtuo kag ang akon man.” (Roma 1:11, 12, NW) Ang mga duaw karon sang mga nagalakbay nga manugtatap nagahatag man sing kaangay sini nga mga kahigayunan para sa pagbayluhanay sing pagpalig-on.
2. Ngaa abanse nga ginapahibalo ang duaw sang manugtatap sang sirkito?
2 Ang Kongregasyon: Ang duaw sang manugtatap sang sirkito masami nga ginapahibalo sa kongregasyon mga tatlo ka bulan sing abanse. Nagahatag ini sa aton sing tion nga mapasibu ang aton iskedyul agod makapanginpulos kita sing bug-os. (Efe. 5:15, 16) Kon nagapangempleyo ka, basi puede ka na makapangabay sa imo amo nga magbakasyon sa trabaho agod makapakigbahin ka sa pag-alagad sa latagon sa sina nga semana. Ang iban nagaauxiliary payunir sa bulan sang duaw. Kon may plano ka nga magkadto sa iban nga lugar, puede mo bala ipasibu ang imo mga plano agod mangin presente ka sa sina nga semana?
3. Ano ang aton personal nga mahimo sa tion sang duaw agod makatigayon sing pagpalig-on?
3 Ang panguna nga katuyuan sang duaw sang manugtatap sang sirkito amo ang paghatag sing personal nga pagpalig-on kag paghanas sa ministeryo sa latagon. Puede ka makapangabay nga mag-upod sa iya ukon sa iya asawa kon minyo sia. Ang manugtatap sang sirkito nalipay sa pagpanghikot upod sa nanuhaytuhay nga mga manugbantala, lakip sa yadtong mga di-eksperiensiado ukon indi pa tanto sangkol sa ministeryo. Ang tanan makatuon sa iya presentasyon kag makabenepisyo sa bisan ano nga panugda nga mahimo niya ihatag sing mainayuhon. (1 Cor. 4:16, 17) Mas daku pa gid ang kahigayunan nga makapalig-unanay kamo kon agdahon mo sia nga magkaon upod sa imo. (Heb. 13:2) Bangod ang iya pamulongpulong ginapasibu sa kinahanglanon sang kongregasyon, dapat mamati ka sing maayo.
4. Paano naton mapalig-on ang aton manugtatap sang sirkito?
4 Ang Manugtatap sang Sirkito: Si Pablo indi tuhay sa mga kauturan sa kongregasyon. Nakaeksperiensia man sia sing mga kabudlayan kag kabalaka, kag ginakinahanglan niya kag ginapabaloran ang pagpalig-on. (2 Cor. 11:26-28) Sang nahibaluan sang kongregasyon sa Roma nga si Pablo, nga isa na karon ka bilanggo, manug-abot sa ila lugar, ang iban naglakbay pakadto sa Merkado sang Apio agod sug-alawon sia—mga 74 kilometros ang kalayuon gikan sa ila! “Sang nakita sila ni Pablo nagpasalamat sia sa Dios kag nagpakaisog.” (Binu. 28:15) Sarang mo man mapalig-on ang inyo manugtatap sang sirkito. Ipakita sa iya ang “pilo nga kadungganan” paagi sa imo mainit nga pagsakdag sa iya pagduaw. (1 Tim. 5:17) Ipabutyag ang imo hanuot nga apresasyon sa iya mga panikasog para sa inyo. Malipay sia kag ang iya asawa kon makita nila ang imo pagtuo, gugma, kag pagbatas.—2 Tes. 1:3, 4.
5. Ngaa nagakinahanglan kita tanan sing pagpalig-on karon?
5 Sa sining “makahalanguyus nga mga tion,” sin-o bala sa aton ang wala nagakinahanglan sing pagpalig-on? (2 Tim. 3:1) Mamat-od karon nga magpakigbahin sing bug-os sa pinasahi nga semana sang hilikuton upod sa manugtatap sang sirkito. Tanan kita, nagalakbay nga manugtatap man ukon mga manugbantala, sarang makabayluhanay sing pagpalig-on sa iban. Sa sining paagi, “maglinaygayay . . . kag maglinig-onay [kita].”—1 Tes. 5:11.