Indi Magpangalag-ag!
1. Sa anong paagi wala naton ‘ginapunggan ang maayo’?
1 Paagi sa aktibo nga pagpakigbahin sa pagbantala sing maayong balita sang Ginharian sang Dios, wala naton ‘ginapunggan ang maayo’ sa mga tawo sa aton mga teritoryo. (Hulu. 3:27) Wala na kita sing mas maayo pa nga mensahe nga mapaambit sa mga tawo sangsa maayong mga kahimtangan nga magaabot sa paggahom sang Dios. Bisan pa mapisan ka sa pagpaambit sang paglaum tuhoy sa Ginharian paagi sa di-pormal nga pagpanaksi ukon sa pagpahamtang sing mga literatura, ngaa indi mo himuon nga tulumuron nga makadumala sing isa ka pagtuon sa Biblia, kon wala ka pa sing ginatun-an?
2. Ano ang mahimo nga magpugong sa aton agod makasugod sing isa ka pagtuon sa Biblia?
2 Kon kaisa, ang isa sa labing daku nga balagbag nga nagapugong sa aton sa pagdumala sing isa ka pagtuon sa Biblia amo ang aton balatyagon tuhoy sa sini. Ang pila nagapangalag-ag sa pagdumala sing pagtuon sa Biblia bangod nagabatyag sila nga indi sila sangkol ukon bangod sang ila masako nga iskedyul. Mahimo makabulig sa imo ang masunod nga mga panugda agod indi ka mangalag-ag sa pagsugod sing pagtuon sa Biblia.—Mat. 28:19; Binu. 20:20.
3. Ngaa kalipikado kita sa pagtudlo sing Biblia?
3 Pagkadi-sangkol: Ayhan manubo lang ang imo ineskwelahan ukon kon kaisa wala ka sing kompiansa sa imo ikasarang sa pagdumala sing isa ka pagtuon sa Biblia. Ang madinalag-on nga mga ministro sang unang siglo mga “walay tinon-an, dimaalam nga mga tawo.” Ngaa nasarangan nila tudluan sing kamatuoran ang iban? Bangod “nakapakig-upud sila kay Jesus.” (Binu. 4:13) Nakatuon sila gikan sa Daku nga Manunudlo nga si Jesus, nga ang pamaagi sa pagpanudlo nasulat sa Kasulatan para sa aton. Gani, bisan limitado lamang ang imo sekular nga tinun-an, nagatigayon ka sing espirituwal nga edukasyon nga indi malabawan sang bisan ano nga edukasyon.—Isa. 50:4; 2 Cor. 3:5.
4. Ano ang matun-an naton sa halimbawa ni Amos?
4 Ginagamit kon kaisa ni Jehova ang mga manalagna agod sabdungon ang nakasayop nga mga gumalahom ukon mga opisyal. Ang pila, kaangay ni Amos, naggikan sa kubos nga kahimtangan. Si Amos nagbaton: “Indi ako manalagna, ukon anak ako sang manalagna; kondi manugbantay ako sang kahayupan, kag manugtatap sang sicomoro.” (Amos 7:14) Walay sapayan sini, wala nangalag-ag si Amos sa pagpalab-ot sang mensahe sang paghukom sa nagasimba sa tinday nga baka nga saserdote nga si Amasias. (Amos 7:16, 17) Dapat naton pirme dumdumon nga ang ginahimo naton hilikuton sang Dios kag sangkapan niya kita agod mangin kalipikado sa hilikuton nga ginhatag niya sa aton.—2 Tim. 3:17.
5. Ngaa dapat naton tinguhaan nga makasugod sing isa ka pagtuon sa Biblia bisan pa masako ang aton iskedyul?
5 Masako nga Iskedyul: Bisan pa masako ang imo iskedyul, mahimo nga may ginapain ka nga tion para makapakigbahin sing regular sa ministeryo. Ang pagdumala sing pagtuon sa Biblia isa sa labing makalilipay nga bahin sang aton ministeryo. Isa gid ka pribilehiyo nga masaksihan ang pagpanghikot sang Pulong ni Jehova sa kabuhi sang isa ka tawo. (Heb. 4:12) Malipay si Jehova kon magsakripisyo kita agod mabuligan ang isa nga “makadangat sa pagkilala sang kamatooran.” (1 Tim. 2:4) Bisan gani ang mga anghel malipay kon ang isa maghinulsol kag mag-uswag sa espirituwal.—Luc. 15:10.
6. Ano ang aton pribilehiyo sa pagtuman sang kabubut-on sang Dios?
6 Ang kabubut-on sang Dios amo “nga ang tanan nga tawo maluwas kag makadangat sa pagkilala sang kamatooran.” (1 Tim. 2:4) Daw ano gid ka daku ang aton pribilehiyo sa pagpanghikot nahisuno sa kabubut-on sang Dios, kag wala nagapangalag-ag sa pagdumala sing mga pagtuon sa Biblia!