Dapat Naton Huptan ang Aton Kakugi sa Ministeryo
1 Kada tuig sugod sang 1992, naghinguyang ang mga Saksi ni Jehova sing kapin sa isa ka bilyon ka oras sa bug-os nga kalibutan sa pagbantala sang Ginharian kag sa paghimo sing disipulo. Daw ano kita ka malipayon nga may diutay kita nga naamot sa sining dalayawon nga kadalag-an!—Mat. 28:19, 20.
2 Siempre pa, ang tanan nga pasalamat kag pagdayaw ginapatungod naton kay Jehova, nga amo ang nagabulig sa aton ministeryo sa sining “makahalanguyus nga mga tion.” (2 Tim. 3:1) Ano ang aton dapat himuon agod makapadayon kita sa pagpakigbahin sing makugihon sa sining labing importante nga hilikuton?
3 Rason sang Kakugi: Ang tudok nga gugma sa Dios kag sa isigkatawo, subong man ang aton tinagipusuon nga handum nga tumanon ang aton dedikasyon, amo ang nagapahulag sa aton nga ibantala ang Ginharian. (Mat. 22:37-39; 1 Juan 5:3) Ang gugma amo ang nagapahulag sa aton nga magsakripisyo agod makapakigbahin kita sing bug-os sa pagbantala.—Luc. 9:23.
4 Magpanikasog Agod Mahuptan ang Kakugi: Nagapanikasog gid ang aton kaaway nga Yawa sa pagpatahaw sang aton kakugi sa ministeryo. Ang di-pagsapak sang mga tawo sa aton teritoryo, ang mga tublag sa sini nga kalibutan, ang pag-ipit sa matag-adlaw nga pagkabuhi, kag ang kabalaka sa aton nagaluya nga panglawas amo ang pila sa mga butang nga ginagamit niya agod paluyahon kita.
5 Busa, dapat kita manikasog agod indi magtahaw ang aton kakugi. Importante gid nga palambuon naton ang aton “nahaunang gugma.” Nagadalahig ini sang regular nga pagbasa kag pagpamalandong sa Pulong sang Dios, ang Biblia, kag pagpanginpulos sa tanan nga publikasyon nga ginaaman sang “ulipon nga matutum kag mainandamon.”—Bug. 2:4; Mat. 24:45; Sal. 119:97.
6 Subong sang maathag nga ginapakita sang mga tagna sa Biblia, nagahilapit na gid ang adlaw sang paglaglag ni Jehova sa di-diosnon nga mga tawo. (2 Ped. 2:3; 3:10) Bangod sini, kabay nga panikasugan gid naton nga huptan ang aton kakugi sa ministeryo, nga nagapakigbahin sing bug-os sa pagbantala tuhoy sa Ginharian kag sa paghimo sing disipulo karon!