Sa Sining Panahon sang Memoryal, Ilugon Mo Bala ang Kakugi ni Jehova kag ni Jesus?
1. Ano ang ginapanikasugan nga himuon sang mga Saksi ni Jehova sa panahon sang Memoryal?
1 Si Jehova makugi nga nagatuman sang iya katuyuan. Ginapatuhuyan ang pila ka pagpakamaayo sang Ginharian sang Dios, ang Isaias 9:7 nagasiling: “Pat-uron sang kakugi ni Jehova sang mga kasuldadusan nga matuman ini.” Sing kaanggid, sa tion sang iya ministeryo sa duta, ginpakita sang Anak sang Dios ang iya kakugi sa matuod nga pagsimba. (Juan 2:13-17; 4:34) Kada tuig sa panahon sang Memoryal, minilyon ka manugbantala sa bilog nga kalibutan ang nagapanikasog nga mailog ang kakugi ni Jehova kag ni Jesus paagi sa pagdugang sang ila hilikuton sa ministeryo. Mangin isa ka bala sa ila?
2. Ano ang ginapahulag sa aton sang kakugi nga himuon sugod sa Marso 7?
2 Kampanya Para sa Memoryal: Sa sini nga tuig, ang kampanya para sa Memoryal magasugod sa Sabado, Marso 7. Magplano na subong para makapakigbahin ka sing makugi sa ministeryo. Nalangkag gid ang mga kongregasyon nga makapakigbahin sa pagkobre sang ila tanan nga teritoryo tubtob posible. Tinguhai gid nga agdahon ang imo mga ginatun-an sa Biblia, ginabalik duaw, kaupod sa trabaho, paryente, kag kaeskwela paagi sa paghatag sa ila sing imbitasyon ukon paggamit sang jw.org.
3. Paano naton mapasangkad ang aton ministeryo sa Marso kag Abril?
3 Auxiliary Payunir: Mapahulag man kita sang kakugi nga pasangkaron ang aton ministeryo. Pat-od nga madamo ang maga-auxiliary payunir sa Marso kag Abril, bangod may ara kita kahimusan nga puede 30 ka oras ang lab-uton. Sa inyo pangpamilya nga pagsimba ukon sa imo personal nga pagtuon, ipangamuyo kon paano ini mahimo. (Hulu. 15:22) Ang imo kakugi sa sini nga kampanya makapahulag sa iban nga mangin makugi man. Kon maghimo ka sing mga pagbag-o agod madugangan ang imo hilikuton, ginailog mo ang kakugi ni Jesus.—Mar. 6:31-34.
4. Ano ang mga pagpakamaayo kon ilugon naton ang kakugi ni Jehova kag ni Jesus?
4 Ang aton pag-ilog sa kakugi ni Jehova kag ni Jesus sa panahon sang Memoryal magaresulta sa bugana nga pagpakamaayo. Madamo pa ang mapanaksihan. Mabatyagan naton ang kalipay kag pagkakontento bangod sa aton pag-alagad kay Jehova kag pagbulig sa iban. (Binu. 20:35) Labaw sa tanan, mapahamut-an naton ang aton makugi nga Dios kag ang iya Anak.