Dumduma ang Gawad Sing Mapinasalamaton
1, 2. Ngaa dapat naton dumdumon ang gawad sing mapinasalamaton?
1 Bilang pagsunod sa sugo ni Jesus, ang mga Cristiano sa bug-os nga kalibutan magatipon sa Sabado, Marso 22, 2008, pagtunod sang adlaw, agod dumdumon ang kamatayon ni Jesucristo. (Luc. 22:19; 1 Cor. 11:23-26) Ginahimo naton ini bangod sang aton tudok nga apresasyon sa tanan nga ginhimo para sa aton sang nagligad nga 1,975 ka tuig. Bangod nahuptan ni Jesus ang himpit nga integridad sa masakit nga kamatayon sa usok sang pag-antos, napakabalaan niya ang ngalan sang iya Amay, kag nakahatag sia sing himpit nga sabat sa pagyaguta ni Satanas.—Job 1:11; Hulu. 27:11.
2 Napalig-on ang bag-o nga katipan paagi sa dugo ni Jesus. Bangod sini, mahimo na mangin mga anak sang Dios ang di-himpit nga mga tawo upod ang paglaum nga maggahom kaupod ni Cristo sa iya langitnon nga Ginharian. (Jer. 31:31-34; Mar. 14:24) Dugang pa, ang tudok nga gugma sang Dios sa katawhan napadayag gid sang ginsakripisyo Niya ang iya hinigugma nga Anak, subong sang ginpaathag mismo ni Jesus kay Nicodemo.—Juan 3:16.
3. Paano makabenepisyo ang mga tumalambong sa Memoryal?
3 Agdaha ang Iban: Nagpanugda ang Enero 2008 nga Ang Aton Ministeryo sa Ginharian nga listahon naton ang aton mga kakilala kag personal sila nga agdahon. May naagda ka na bala sa imo mga nalista? Naghimo ka bala sing kahimusan agod makapakigbahin ka sing bug-os sa kampanya nga pagpangagda para sa Memoryal nga magasugod sa Marso 1? Ang tumalambong makabati sing Makasulatanhon nga impormasyon nga makapabakod sang ila pagtuo sa gawad, kag magapaposible ini sa ila nga makatigayon sing kabuhi nga walay katapusan.—Roma 10:17.
4. Ngaa dapat kita mag-abot sing temprano sa tion sang Memoryal?
4 Ang bisan sin-o nga makasarang, dapat mag-abot sing temprano agod maabiabi ang mga nagbaton sang pangagda. Bangod madamo ang tumalambong sa Memoryal, importante gid nga hatagan naton sing atension ang mga bag-uhan subong man yadtong talagsa lang nagatambong sa mga miting.
5. Paano ninyo mahanda ang inyo tagipusuon sa sini nga okasyon?
5 Ihanda ang Inyo Tagipusuon: Ang Pag-usisa sa Kasulatan sa Adlaw-adlaw—2008 kag ang 2008 Calendar may mga iskedyul para sa pinasahi nga pagbasa sing Biblia para sa Memoryal nga magasugod sa Marso 17. Ang pagbinagbinag sang talalupangdon nga mga hitabo sa ulihi nga bahin sang kabuhi ni Jesus sa duta makabulig sa inyo nga mahanda ang inyo tagipusuon para sa pagsaulog sang Memoryal. (Esd. 7:10) Ang mapinangamuyuon nga pagpamalandong sa sini nga mga kasaysayan sa Biblia magapadalom sang inyo apresasyon sa gugma ni Jehova kag sang iya Anak sa pag-aman sing gawad.—Sal. 143:5.
6. Ano ang epekto kon pabakuron pa gid naton ang aton apresasyon sa gawad?
6 Samtang nagahilapit ang Memoryal, kabay pa nga ihanda naton ang aton kaugalingon kag ang iban para sa sining importante nga okasyon. Ang mapinasalamaton nga pagdumdom sa gawad magapabakod sang aton kaangtanan kay Jehova kag sa iya Anak. (2 Cor. 5:14, 15) Magapahulag man ini sa aton nga ilugon sila sa pagpakita sing masinakripisyuhon nga gugma sa iban.—1 Juan 4:11.