Mga Imbitasyon sa Memoryal nga Ipanagtag sa Bug-os nga Duta!

1. Anong pinasahi nga kampanya sa bug-os nga duta ang himuon antes sang Memoryal?

¹ “Padayon ninyo nga himuon ini bilang pagdumdom sa akon.” (Luc. 22:19) Sa pagsunod sa sining sugo ni Jesus, ang mga sumilimba ni Jehova upod sa mga interesado magatipon sa Marso 30, 2010, agod dumdumon ang kamatayon ni Jesus. Ipanagtag ang pinasahi nga imbitasyon sa Memoryal sa bug-os nga duta sugod sa Marso 13 tubtob Marso 30.

2. Paano naton itanyag ang imbitasyon?

² Kon Paano Ini Himuon: Mahimo mo ihatag ang imbitasyon agod makita sang tagbalay ang laragway sa una nga pahina, nian magsiling: “Sa gab-i sang Marso 30, minilyon sa bug-os nga duta ang magatipon agod dumdumon ang kamatayon ni Jesus. Nakabisita ako para ihatag ina nga imbitasyon sa imo kag sa imo pamilya. Mahimo mo man updon ang imo mga abyan. Palihug tan-awa ang tion kag ang duog nga pagahiwatan sini.” Depende sa kahimtangan, mahimo mo basahon ang Lucas 22:19 sa Biblia sa pagpatalupangod sini nga sugo sa Kasulatan. Dumduma nga bangod limitado lang ang tion para matuptupan ang teritoryo, labing maayo nga lip-uton mo ang imo presentasyon.

3. Sin-o ang mahimo naton imbitahon?

³ Kon malapad ang inyo teritoryo, mahimo nga ipanugda sang mga gulang nga ibilin na lang ang imbitasyon sa mga balay nga wala sing tawo sa inyo una nga pagduaw. Kon nagakaigo, itanyag ang mga magasin kon nagapanagtag sang imbitasyon. Pat-ura nga maimbitar mo ang imo mga ginaduaw liwat, estudyante sa Biblia, kaupod sa trabaho, klasmeyt, paryente, kaingod, kag iban pa.

4. Ano ang aton himuon bilang pagpakita sing apresasyon sa gugma ni Jehova sa pag-aman sang gawad?

⁴ Maghanda Agod Makapakigbahin sing Bug-os: Ang tion sang Memoryal isa gid ka maayo nga tion agod mapasangkad mo ang imo hilikuton. Mahimo mo bala bag-uhon ang imo iskedyul agod makaauxiliary payunir? May mga kabataan ka bala ukon estudyante sa Biblia nga nagauswag sing maayo sa espirituwal? Kon amo, makig-istorya sa mga gulang agod mahibaluan kon bala kalipikado na sila para makigbahin sa sining pinasahi nga kampanya subong di-bawtismado nga manugbantala. Ang pag-apresyar sa gugma ni Jehova sa pag-aman sang gawad magapahulag sa aton indi lamang nga magtambong sa Memoryal kundi mangimbitar man sa iban tubtob sa aton masarangan.—Juan 3:16.