Bag-o nga Programa sa Adlaw sang Pinasahi nga Asambleya

Ang tema sang adlaw sang pinasahi nga asambleya para sa 2009 amo ang “Padayon Ka nga Magbantay nga Ginatuman Mo ang Ministeryo,” pasad sa Colosas 4:⁠17. Subong mga Cristiano, wala naton ginapakadiutay ini nga laygay. Ang aton tulumuron amo ang matutom nga pagtuman sang aton ministeryo subong sang ginhimo ni Jesus. (Juan 17:14) Isa man ka maayo nga halimbawa sa sini si apostol Pablo. Determinado gid sia nga tapuson ang iya dalaganon sa ministeryo.​—⁠Binu. 20:24.

Ipakita sa bahin sang manugtatap sang sirkito kon paano nalandas sang pila ka manugbantala ang mga hangkat sa ministeryo. Nian ipadaku sang pamulongpulong nga “Atipana ang Imo Gintanom” kon paano gid kita makabulig sa mga “husto nga nahuyog para sa kabuhi nga walay katapusan.” (Binu. 13:48) Una nga binagbinagon sang nagaduaw nga humalambal ang kada bersikulo sang 2 Corinto 6:1-10, sa pamulongpulong nga “Kon Paano Naton Ginarekomendar ang Aton Kaugalingon Subong mga Ministro.” Ipaathag naman niya sa hapon nga sesyon ang tema nga “Pabalori Gid ang Imo Ministeryo.” Pat-od gid nga mapalig-on ka sa mga bahin nga “Nagakalipay sa Ministeryo ang mga Lamharon kag mga Tigulang” kag “Mga Pamatan-on nga Nagatuman sang Ministeryo.” Dapat pahibaluon gilayon sang mga luyag magpabawtismo sa nagahilapit nga sirkito ukon pinasahi nga asambleya ang nagadumala nga manugtatap. Isa ka importante nga bahin sang tanan naton nga asambleya kag kombension ang pagbinagbinag sang Ang Lalantawan. Pat-ura nga madala ang imo kopya nga pagatun-an sa semana sang adlaw sang pinasahi nga asambleya.

Samtang ginatuman naton ang aton ministeryo nga gintugyan ni Jehova, panikasugan naton nga indi ini matabunan sang iban nga interes kag hilikuton. Ang mga pagpalig-on paagi sa Kasulatan sa adlaw sang pinasahi nga asambleya magabulig sa aton nga mahantop kon ano ang dapat naton nga himuon agod mahuptan ang aton kakugi kag mapamalandungan kon ano ang aton ginahimo karon agod matuman sing bug-os ang aton ministeryo.