Tudlui ang Iban nga Higugmaon si Jehova

1. Ngaa ang pila nangin suod kay Jehova?

¹ Nadumduman mo bala ang una nga tion nga nakabati ka tuhoy kay Jehova? Ano ang nagpasuod sa imo sa iya? Madamo nga bunayag sing tagipusuon nga tawo ang magasugid sa imo nga nangin suod sila sa aton Manunuga sang natun-an nila ang iya wala-tupong nga mga kinaiya, ilabi na ang iya kaawa kag gugma.​—1 Juan 4:8.

2, 3. Paano naton gamiton ang libro nga Ginatudlo Sang Biblia sa pagbulig sa mga estudyante sa Biblia nga mag-uswag sa ila gugma kay Jehova?

² “Ini Amo ang Aton Dios”: Ginapadaku sang libro nga Ginatudlo Sang Biblia ang gugma ni Jehova kag ang kinahanglanon nga magtigayon sing isa ka personal nga kaangtanan sa iya. Paano naton magamit ining publikasyon agod tudluan ang iban nga magpalambo sing gugma sa Dios? Kon nagapaathag sing isa ka bag-o nga punto, mahimo kita magpautwas sing makapahunahuna nga mga pamangkot, subong sang: “Ano ang ginasugid sining kamatuoran tuhoy kay Jehova?” ukon “Paano ginapamatud-an sining punto nga si Jehova amo ang pinakamaayo nga Amay nga matigayon naton?” Ang pagtudlo sa sining paagi makabulig sa estudyante nga magpalambo sing mabakod nga kaangtanan kay Jehova.

³ Kon buligan naton ang mga estudyante sa Biblia nga mahangpan nga ang pagkuha sing ihibalo tuhoy sa lamang matuod kag buhi nga Dios isa gid ka daku nga pribilehiyo, mahimo nila ilugon ang ginsiling ni Isaias, “Ini amo ang aton Dios.” (Isa. 25:9) Kon nagapaathag sang Pulong sang Dios, dapat ipadaku naton ang mga pagpakamaayo nga maagom sang katawhan kon matuman na ang mga katuyuan ni Jehova paagi sa iya harianon nga panguluhan sa idalom ni Cristo Jesus.​—Isa. 9:6, 7.

4, 5. Ano ang buot silingon sang paghigugma kay Jehova?

⁴ Pamatuod sang Gugma kay Jehova: Nahibaluan naton nga ang paghigugma kay Jehova sa bug-os nga tagipusuon, kalag, kag hunahuna indi lamang basta pagbatyag sing mabaskog nga balatyagon para sa Dios. Dapat naton ilugon ang iya panghunahuna. (Sal. 97:10) Ang gugma sa Dios mapakita paagi sa pagtuman sang tanan niya nga sugo kag sa pagpadayon sa paghimo sing “balaan nga paggawi kag sa mga buhat sang diosnon nga debosyon,” bisan sa atubangan sang mga pagtilaw kag pagpamatok.​—2 Ped. 3:11; 2 Juan 6.

⁵ Nalipay kita sa paghimo sang kabubut-on sang Dios bangod ginahigugma naton sia. (Sal. 40:8) Dapat mahangpan sang estudyante sa Biblia nga ang tanan nga sugo sang Dios gindesinyo para sa walay katapusan nga kaayuhan sang Iya mga alagad. (Deut. 10:12, 13) Paagi sa pagkabuhi nahisuno sa panuytoy ni Jehova, mapakita sang isa ang iya tudok nga apresasyon sa tanan nga dalayawon nga binuhatan ni Jehova. Buligi ang estudyante nga mahangpan nga ang paglakat sa matarong nga mga dalanon ni Jehova makabulig sa iya nga malikawan ang daku nga kasakit.

6. Ano nga mga pagpakamaayo ang mabaton sang isa bangod sa paghigugma kay Jehova?

⁶ Mga Pagpakamaayo sang mga Nagahigugma kay Jehova: Si Jehova nagaulikid gid sa mga mapainubuson nga nagahigugma sa iya, kag ginapahayag niya sa ila “ang madalom nga mga butang sang Dios.” (1 Cor. 2:9, 10) Kon mahibaluan nila ang mga katuyuan ni Jehova, makatigayon sila sing masanag nga palaabuton kag malig-on nga paglaum. (Jer. 29:11) Yadtong mga nagahigugma kay Jehova makaeksperiensia sang iya tumalagsahon nga kaayo. (Ex. 20:6) Bangod sa daku nga gugma sang Dios sa ila, may paglaum sila nga mabuhi sing walay katapusan.​—Juan 3:16.

7. Ano ang ginabatyag mo sa pagtudlo sa iban nga higugmaon si Jehova?

⁷ Samtang labi naton nga makilala ang aton langitnon nga Amay, labi man kita nga mapahulag nga magsugid sa iban tuhoy sa iya. (Mat. 13:52) Isa gid ka hamili nga pribilehiyo nga tudluan ang iban, kag ilabi na ang aton kabataan, nga higugmaon si Jehova! (Deut. 6:5-7) Kabay nga kita, upod sa aton mga estudyante sa Biblia, padayon nga magdayaw kay Jehova samtang ginaagom naton ang iya “dakung pagkaayo.”​—Sal. 145:7.