Ginahanas Kita ni Jehova Para sa Sini nga Hilikuton

1. Kon hatagan ni Jehova ang mga tawo sing asaynment, ano ang iya ginahimo?

¹ Kon hatagan ni Jehova ang mga tawo sing asaynment, ginahatagan man niya sila sing bulig sa pagtuman sini. Halimbawa, sang ginsugo ni Jehova si Noe nga magtukod sing arka, butang nga wala pa gid anay niya mahimo, ginsugiran man sia ni Jehova kon paano ini himuon. (Gen. 6:14-16) Sang si Moises, nga isa ka mapainubuson nga manugbantay sing karnero, gin-asayn nga mag-atubang sa tigulang nga mga lalaki sang Israel kag kay Paraon, ginpasalig sia ni Jehova: “Magaupud ako sa imo baba kag magatudlo sa imo sang imo ihambal.” (Ex. 4:12) May kaangtanan sa aton asaynment nga pagbantala, ginahatagan man kita ni Jehova sing bulig. Ginahanas niya kita paagi sa Teokratikong Eskwelahan Para sa Ministeryo kag Miting sa Serbisyo. Paano kita makabenepisyo sa sini nga paghanas?

2. Paano kita makabenepisyo sa Teokratikong Eskwelahan Para sa Ministeryo?

² Teokratikong Eskwelahan Para sa Ministeryo: Basaha kag tun-i ang mga bahin nga nakaiskedyul antes magtambong sa miting. Dayon samtang gina-obserbahan mo kon paano ini ginahatag sang mga estudyante, magauswag man ang imo ikasarang sa pagtudlo. (Hulu. 27:17) Dal-a ang imo libro nga Eskwelahan Para sa Ministeryo sa miting kag gamita ini nga sululatan sang mga nota. Kon patuhuyan ini sang manugtatap sang eskwelahan pagkatapos sang isa ka bahin, kuriti ang importante nga mga punto nga luyag mo gamiton, kag mahimo mo sulatan ang marhin sang libro. Apang, makabenepisyo ka gid sa sini nga eskwelahan kon magpakigbahin ka. Naka-enrol ka bala? Kon makabaton ka sing asaynment, handai ini sing maayo kag sunda ang laygay nga imo mabaton. Nian, gamita ang imo natun-an sa ministeryo.

3. Paano kita makabenepisyo sa Miting sa Serbisyo?

³ Miting sa Serbisyo: Mas madumduman naton ang mga panugda sa sini nga miting kon basahon naton sing abanse ang materyal kag maghanda sing komento. Kon lip-uton lang naton ang aton komento, mas madamo ang makapakigbahin. Obserbahi sing maayo ang mga pasundayag, kag gamita ang mga panugda nga sa banta mo makabulig agod mangin mas epektibo ang imo ministeryo. Tipigi ang importante nga mga artikulo sa Ang Aton Ministeryo sa Ginharian nga magamit mo sa ulihi.

4. Ngaa dapat naton panginpuslan ang teokratikong mga paghanas?

⁴ Kaangay sa mga asaynment nga ginhatag kanday Noe kag Moises, ang aton pagbantala sang maayong balita sa bug-os napuy-an nga duta indi mahapos. (Mat. 24:14) Apang magamadinalag-on kita kon magsalig kita kay Jehova, ang aton Dakung Instruktor, kag panginpuslan ang mga paghanas nga iya ginaaman.—Isa. 30:20.