Pinasahi nga Adlaw sa Pagtanyag sing mga Pagtuon sa Biblia
1 Sugod sa Enero, ang kada kongregasyon magaiskedyul kada bulan sang isa ka adlaw sa talipuspusan sang semana, ayhan sa una nga semana, agod magkonsentrar sa pagtanyag sing mga pagtuon sa Biblia. Mahimo ini sa Sabado ukon sa Domingo, depende sa kon ano ang pinakamaayo sa inyo duog. Kon wala ginbaton sang tagbalay ang pagtuon, mahimo gihapon itanyag sang manugbantala ang Ginatudlo Sang Biblia nga libro ukon ang pinakabag-o nga mga magasin. Ang tanan nga gulang kag ministeryal nga alagad dapat makigbahin sing bug-os sa sini nga hilikuton kag buligan ang mga manugbantala nga makasugod sing mga pagtuon sa Biblia.
2 Ang Komite sang Pag-alagad sang Kongregasyon amo ang magadesisyon kon ano nga adlaw sa talipuspusan sang semana ang italana sa pagtanyag sing pagtuon sa Biblia. Dapat regular nga pahanumdumon ang mga manugbantala sang kahimusan agod mabuligan sila nga makahanda sing maayo kag mangin makugi sa pagtanyag sing mga pagtuon sa Biblia sa pamalaybalay kag sa pagduaw liwat sa mga nagpakita sing interes.
3 Kon Paano Maghanda: Ang mga panugda sa pagsugod sing mga pagtuon sa Biblia makita sa suplemento sang Enero 2006 nga Ang Aton Ministeryo sa Ginharian kag sa pahina 12 sang Reasoning nga libro. Mahimo man gamiton ang tract, kaangay sang Luyag Mo Bala Mahibaluan ang Kamatuoran? May mga panugda man ang pahina 4 sang Abril 2007 nga Ang Aton Ministeryo sa Ginharian kon paano makasugod sing mga pagtuon sa Biblia kon nagaduaw liwat sa mga nagbaton sang mga magasin. Dapat nga may iskedyul ang mga gulang kag ministeryal nga alagad sa pagdumala sang 10 tubtob 15 minutos nga miting para sa pag-alagad sa latagon. Sa sini nga tion, binagbinagon ukon ipasundayag ang isa ukon duha ka praktikal nga panugda sa pagsugod sing pagtuon sa Biblia.
4 Siempre pa, indi tanan magabaton ukon magapadayon sa pagtuon sa Biblia. Indi ini dapat magpugong sa aton, bangod si Jehova man ang nagabuyok sa mga tulad-karnero sa iya organisasyon. (Juan 6:44) Indi lang pagsab-ug sang binhi sang kamatuoran ang aton salabton. Dapat man naton palambuon kag bunyagan ang mga nagtubo, kag nalakip sa sini ang paghiwat sing pagtuon sa Biblia sa mga may matarong sing tagipusuon. Kon himuon naton ini, pribilehiyo naton nga mangin masigkamanugpangabudlay sang Dios.—1 Cor. 3:9.