Pirme Magtanyag sing Pagtuon sa Biblia
1. Ano ang nadalahig sa pagtuman sa sugo ni Jesus sa Mateo 28:19, 20?
1 Ginsugo kita ni Jesus nga “maghimo sang mga disipulo . . . , nga nagapanudlo sa ila.” (Mat 28:19, 20) Gani, luyag naton nga pirme kita handa sa pagtanyag sing pagtuon sa Biblia, indi lang sa pinasahi nga adlaw sa talipuspusan nga semana nga ginpili sa pagtanyag sing mga pagtuon sa Biblia. Mahimo makabulig ang masunod nga mga panugda.
2. Sin-o ang puede naton tanyagan sing pagtuon sa Biblia?
2 Magtanyag: Kon pirme kita nagatanyag sing pagtuon sa Biblia, mas daku ang kahigayunan nga makatigayon kita sing pagtuon. (Man. 11:6) Natilawan mo na bala ang direkta nga pagtanyag? Ang isa ka kongregasyon sa Estados Unidos nagtinguha gid sa pagtanyag sing mga pagtuon sa Biblia sa bug-os nga bulan. Nalipay gid sila kay nakasugod sila sing 42 ka bag-ong pagtuon sa Biblia! Indi maghaumhaum nga ginapaabot na sang mga interesado nga tun-an mo sila sa Biblia. Sa imo pagbalik, ngaa indi mo sila tanyagan sing pagtuon? Kon balibaran ka nila, wala man sing malain. Puede mo gihapon matatap ang ila interes. Napamangkot mo na bala ang imo mga kaingod, paryente, katrabaho, kag kaeskwela kon luyag nila magtuon sa Biblia? Mahimo mo man mapamangkot ang imo mga estudyante sa Biblia kon may mga abyan sila ukon paryente nga luyag magtuon sa Biblia.
3. Ano ang isa sa mabuligon nga kagamitan sa pagsugod sing mga pagtuon, kag san-o naton ini mahimo magamit?
3 Mabuligon nga Kagamitan: Ang isa sa mabuligon nga kagamitan para makasugod sing pagtuon sa Biblia amo ang tract nga Luyag Mo Bala Mahibaluan ang Kamatuoran? Mahimo mo ini ihatag sa tagbalay, magabaton man sila sang iban nga literatura ukon indi. Mahimo ini magamit kon nagabantala sa lugar sang negosyo, sa kalye, paagi sa sulat, kag kon nagabalik duaw. Mahimo man ini mabilin sa mga balay nga wala sing tawo. Ngaa indi mo ini dal-on kon nagasakay ka sa publiko nga mga salakyan, kon nagapamalaklon, kag kon nagatrabaho? Ginapaathag sa likod sini nga tract ang kahimusan parte sa pagtuon sa Biblia kag ginasugid sini ang libro nga Ginatudlo Sang Biblia.
4. Paano naton magamit ang Mahibaluan ang Kamatuoran nga tract sa pagsugod sing pagtuon?
4 Kon mahatag na ang tract sa tawo, mahimo mo mapatalupangod sa iya ang mga pamangkot sa una nga pahina kag pamangkuton sia, “Diin sa sini nga mga pamangkot ang luyag mo hambalan?” Nian binagbinaga ninyo nga duha ang sabat sa tract, kag basaha ukon binagbinaga ang katapusan nga pahina, nga nagapaathag sang aton kahimusan sa pagtuon sa Biblia. Nian mahimo mo mapakita sa iya nga masapwan ang dugang nga impormasyon sa sini nga topiko sa libro nga Ginatudlo Sang Biblia, itanyag ini nga libro, kag maghimo sing kahimusan sa pagbalik para ipadayon ang paghinun-anon.
5. Ngaa dapat kita magtanyag pirme sing pagtuon sa Biblia?
5 Sa aton teritoryo, may mga interesado pa nga luyag makahibalo sa mga ginatudlo sang Biblia. Paagi sa pagtanyag pirme sing pagtuon sa Biblia, mas daku ang aton kahigayunan nga mabatyagan ang kalipay sa pagbulig sa iban nga maglakat sa dalan pa kabuhi.—Mat. 7:13, 14.