Tatlo ka Adlaw nga Espirituwal nga Kaumpawan
1. Ano ang aton ginapaabot sa distrito nga kombension sa sini nga tuig?
1 Sa sining kalibutan ni Satanas nga kigas sa espirituwal, si Jehova padayon nga nagapaumpaw sa iya mga alagad. (Isa. 58:11) Ang isa ka paagi nga ginahimo niya ini amo ang aton distrito nga kombension kada tuig. Samtang nagahilapit ang kombension sa sini nga tuig, paano kita makahanda sa pagtigayon kag pagpaambit sang espirituwal nga kaumpawan?—Hulu. 21:5.
2. Ano nga mga paghanda ang kinahanglan naton himuon?
2 Kon wala mo pa mahimo, tinguhai nga maghanda nga matambungan ang tatlo ka adlaw nga kombension paagi sa pag-iskedyul sang imo personal kag sekular nga mga hilikuton. Ginbinagbinag mo na bala kon daw ano kalawig ang imo biyaheon pakadto sa pasilidad kada adlaw agod makaabot ka sing temprano kag makakita sing pulungkuan antes magsugod ang programa? Indi gid naton luyag nga may mawasi kita sa makapaumpaw sa espirituwal nga pagkaon nga ginhanda ni Jehova para sa aton! (Isa. 65:13, 14) Nakahimo ka na bala sing kahimusan sa dalayunan kag transportasyon?
3. Ano nga mga panugda ang makabulig sa aton kag sa aton pamilya para makabenepisyo sing bug-os sa programa?
3 Ano ang makabulig sa imo agod makapamati ka sing maayo sa tion sang sesyon? Tinguhai nga magtulog sing temprano. Tuluka ang humalambal. Sundi ang kada teksto sa imo Biblia. Magkuha sing malip-ot nga mga nota. Mas maayo nga ang mga miembro sang pamilya ululupod pungko agod mabantayan sang mga ginikanan ang ila kabataan. (Hulu. 29:15) Kada gab-i, mahimo ninyo binagbinagon subong pamilya ang mga ginpadaku nga punto sa programa. Agod padayon nga mapaumpawan ang inyo pamilya sa tapos sang kombension, mahimo kamo magtalana sing tion sa inyo Pangpamilya nga Pagsimba sa pagrepaso sang pila ka punto nga puede ninyo iaplikar.
4. Paano naton mabuligan ang iban sa aton kongregasyon nga makabaton sing espirituwal nga kaumpawan?
4 Buligi ang Iban nga Makabaton sing Kaumpawan: Luyag naton nga makabaton man sing espirituwal nga kaumpawan ang iban. May mga tigulang bala ukon iban pa sa inyo kongregasyon nga nagakinahanglan sing bulig agod makatambong sa kombension? Mabuligan mo bala sila? (1 Juan 3:17, 18) Dapat siguraduhon gid sang mga gulang, ilabi na sang mga manugtatap sang grupo, nga mabuligan ini nga mga kauturan nga makatambong.
5. Paano naton ipanagtag ang mga imbitasyon para sa kombension? (Tan-awa man ang kahon sa idalom.)
5 Subong sang ginhimo naton sang nagligad, tatlo ka semana antes magsugod ang kombension, may kampanya naman kita sa pag-imbitar sa iban sa pagtambong. Dapat tinguhaan gid sang kongregasyon nga mapanagtag ang tanan nga imbitasyon kag kobrehan ang pinakamadamo nga teritoryo tubtob posible. Ang mabilin nga imbitasyon sang inyo pamilya pagkatapos sang kampanya dapat dal-on sa kombension agod magamit sa pagpanaksi sang di-pormal. May dugang kita nga impormasyon parte sini nga mabaton sa programa sa Biernes. Kon wala na sing plano ang inyo pamilya nga gamiton ang imbitasyon sa siudad nga pagahiwatan sang kombension, dapat ninyo ini ihatag sa attendant pagsulod sa pasilidad. Magbilin sing isa ka kopya para sa imo agod magamit mo sa katapusan nga pamulongpulong sa Domingo.
6. Sa ano nga mga paagi mapakita naton ang maayong pamatasan sa kombension?
6 Makapaumpaw ang Maayo nga Pamatasan: Sa karon nga madamo ang “mahigugmaon sa kaugalingon” kag wala sing labot sa balatyagon sang iban, daw ano ka makapaumpaw nga makaupod ang mga masigka-Cristiano nga nagapakita sing maayo nga pamatasan! (2 Tim. 3:2) Mapakita naton ang maayo nga pamatasan kon indi kita magdinaguso sa pagsulod sa pasilidad kada adlaw kag sa pagtigana lamang sing pulungkuan sa mga kaupod naton sa balay ukon sa salakyan ukon sa mga ginatun-an naton sa Biblia. Nagatuman man kita kon maghambal ang tsirman nga mapungko na kita agod mamati sa musika antes magsugod ang sesyon. Dapat man naton i-silent ukon i-off ang aton cell phone agod indi ini makatublag sa iban sa tion sang programa. Indi man kita dapat mag-istorya, mag-text, magkaon, ukon maglagawlagaw sa tion sang programa.
7. Paano kita makatigayon kag makahatag sing kaumpawan sa pagpakig-upod sa mga kauturan?
7 Makapaumpaw nga Pagpakig-upod: Ang mga kombension nagahatag sa aton sing kahigayunan nga matigayon ang makapaumpaw nga Cristianong paghiusa kag paghiliutod. (Sal. 133:1-3) Ngaa indi ka mag-una nga makig-istorya sa mga kauturan halin sa iban nga kongregasyon para “magpasangkad”? (2 Cor. 6:13) Puede mo himuon nga tulumuron nga makakilala sang isa ka utod ukon pamilya kada adlaw. Maayo ini nga himuon ilabi na sa intermisyon sa udto. Gani magbalon sang diutay lang nga panyaga, dayon magkaon kag magpakig-upod sa iban sa sulod sang pasilidad sa baylo nga magbakal sa gua ukon magkaon sa restawran. Sa amo, mahimo ka makakita sing bag-o kag maayo nga mga abyan.
8. Ngaa dapat kita magboluntaryo sa kombension, kag paano naton ini himuon?
8 Makapaumpaw gid nga makaupod ang aton masigkasumilimba sa sagrado nga pag-alagad! Puede ka bala magboluntaryo sa isa ka departamento ukon magbulig sa inyo kongregasyon sa inyo asaynment sa pagpaninlo? (Sal. 110:3) Kon wala ka pa sing asaynment, palihug palapiti ang Volunteer Service Department sa kombension. Kon madamo ang magboluntaryo, mangin makalilipay kag mamag-an ang ulubrahon.
9. Ngaa dapat naton hatagan sing igtalupangod ang aton paggawi kag panagway sa tion sang kombension?
9 Ang Aton Paggawi Makapaumpaw sa mga Makakita sa Aton: Mga delegado kita sa kombension sa sulod sang tatlo ka adlaw, indi lamang sa tion sang programa. Dapat matalupangdan sang mga nakakita sa aton sa siudad nga ginahiwatan sang kombension ang kinatuhayan naton sa mga indi Saksi. (1 Ped. 2:12) Ang aton pamayo kag pamustura sa duog sang kombension, sa aton dalayunan, kag sa mga restawran dapat nagapadungog kay Jehova. (1 Tim. 2:9, 10) Kon suksukon naton ang aton badge card, makilala kita subong mga Saksi ni Jehova. Mahimo ini maghatag sing kahigayunan nga makaistorya kita sa mga tawo parte sa aton kombension kag makapanaksi.
10. Paano naton masiguro nga mangin positibo ang pagtamod sa aton kombension sang mga staff sa hotel kag restawran?
10 Ang iban sa aton mahimo magdayon sa mga hotel sa tion sang kombension. Paano kita dapat magkooperar sa mga staff sang hotel kag restawran? Dapat sundon naton ang mga pagsulundan tuhoy sa kon pila lang ang puede magtener sa kada kuarto. Likawan man naton nga maggahod para indi madisturbo ang iban. Kon masako ang hotel sa tion nga mag-check-in ukon mag-check-out kita, dapat kita mangin mapinasensiahon kag mainayuhon. (Col. 4:6) Kon kinabatasan sa aton lugar, dapat man kita maghatag sing tip sa mga waiter ukon sa mga staff sang hotel nga nagadala sang aton bag, nagalimpyo sang aton kuarto, kag nagahatag sing iban pa nga serbisyo.
11. Ano nga mga eksperiensia ang nagapakita nga ang Cristiano nga paggawi nagaresulta sa maayo nga panaksi?
11 Ano ang epekto sa iban sang aton maayo nga paggawi sa tion sang kombension? Suno sa isa ka artikulo sang pamantalaan, ang manedyer sang isa ka pasilidad nga gingamit para sa kombension nagsiling: “Matinahuron gid sila nga mga tawo. Nalipay kami nga ari diri sila kada tuig.” Sang nagligad nga tuig, nadula ang kahita sang isa ka indi Saksi sa isa ka hotel nga gindayunan sang mga delegado sang kombension. Sang ginbalik ini sa manedyer sang hotel nga wala sing buhin, ginsilingan niya ang tag-iya: “Maayo lang kay may kombension ang mga Saksi ni Jehova sa sini nga lugar kag madamo sa ila ang nagdayon sa sini nga hotel. Kay kon wala, indi na tani mabalik ang kahita mo.”
12. Samtang nagahilapit ang kombension, ano dapat ang aton mangin tulumuron, kag ngaa?
12 Malapit na lang ang kombension sa sini nga tuig. Daku nga tion kag panikasog ang ginhinguyang agod mangin makapaumpaw ang programa kag ang duog sang kombension. Himua nga tulumuron nga matambungan ang tanan nga tatlo ka adlaw, kag maghanda sa ginpreparar ni Jehova kag sang iya organisasyon para sa imo. Tinguhai nga mangin makapaumpaw sa iban paagi sa imo maayo nga pamatasan, malipayon nga pagpakig-upod, kag maayo nga paggawi. Sa amo mabatyagan mo kag sang iban pa ang ginbatyag sang isa ka tumalambong sang nagligad nga tuig nga nagsiling, “Para sa akon amo ini ang labing makalilipay nga eksperiensia!”
[Blurb sa pahina 3]
Subong sang ginhimo naton sang nagligad, tatlo ka semana antes magsugod ang kombension, may kampanya naman kita sa pag-imbitar sa iban sa pagtambong
[Blurb sa pahina 4]
Ang aton pamayo kag pamustura sa duog sang kombension, sa aton dalayunan, kag sa mga restawran dapat nagapadungog kay Jehova
[Blurb sa pahina 4]
Tinguhai nga mangin makapaumpaw sa iban paagi sa imo maayo nga pamatasan, malipayon nga pagpakig-upod, kag maayo nga paggawi
[Kahon sa pahina 5]
Mga Pahanumdom Para Sa 2011 Distrito Nga Kombension
◼ Iskedyul sang Programa: Ang programa magasugod sa 8:20 s.a. sa Biernes kag Sabado kag 8:50 s.a. naman sa Domingo. Kon ipahibalo na ang musika, dapat makadto na kita tanan sa aton mga pulungkuan agod makasugod ang programa sing mahim-ong. Ang programa sa Biernes kag Sabado matapos sa 4:00 s.h. kag 3:15 s.h. naman sa Domingo.
◼ Palarkingan: Ang pagparking sa duog sang kombension first-come, first-served. Bangod masami nga limitado lang ang palarkingan, mas maayo nga magtingob kamo sa isa lang ka salakyan sangsa magdala sing kaugalingon nga salakyan.
◼ Pagreserba sang Pulungkuan: Mahimo lamang kamo makatigana sing pulungkuan para sa mga kaupod ninyo sa salakyan ukon kaupod sa balay, subong man sa inyo mga ginatun-an sa Biblia.—1 Cor. 13:5.
◼ Panyaga: Palihug magbalon kamo imbes nga maggua agod magbakal sing pagkaon. Puede kamo makadala sing bulutangan sing pagkaon nga sarang mabutang sa idalom sang inyo pulungkuan. Apang ang dalagku nga mga suludlan kag buluk-on nga mga kagamitan wala ginatugutan sa pasilidad sang kombension.
◼ Amot: Mapakita naton nga ginaapresyar naton ang mga kahimusan sa kombension paagi sa paghatag sing boluntaryo nga mga amot para sa bug-os kalibutan nga hilikuton sa Kingdom Hall man ukon sa duog sang kombension. Kon luyag ninyo mag-amot paagi sa tseke, ipangalan ini sa “Watch Tower.”
◼ Aksidente kag Emerhensia: Kon may emerhensia nga matabo sa duog sang kombension, palihug pahibalua ang pinakamalapit nga attendant, nga amo naman ang magapahibalo sa First Aid agod matan-aw ini sang aton kalipikado nga utod nga naasayn sa sini nga departamento kag maghatag sing bulig. Kon kinahanglanon, ang aton utod nga naasayn sa First Aid amo ang matawag sa pinakamalapit nga ospital.
◼ Bulong: Kon nagakinahanglan ka sing ginareseta nga bulong, palihug magdala sing bastante kay indi ini matigayon sa kombension.
◼ Sapatos: Kada tuig, madamo ang nagakaaksidente bangod sa sapatos. Mas maayo nga magsuksok sing maugdang kag indi halog ukon gutok nga sapatos nga puede ilakat sa mga rampa, hagdanan, alagyan nga salsalon nga may buhobuho, kag iban pa.
◼ Rekording: Indi dapat ikonektar sa sound system ukon sa salaksakan sang koryente sa pasilidad ang bisan ano nga recorder. Mahimo lamang ini magamit sa paagi nga indi makatublag sa iban.
◼ Pagkuha sing Retrato: Kon luyag ninyo magkuha sing retrato sa tion sang sesyon, palihug indi maggamit sing flash ukon lipdan ang iban nga nagapamati sa programa.
◼ Please Follow Up (S-43) Form: Dapat gamiton ang Please Follow Up form agod matatap ang bisan sin-o nga nagpakita sing interes sa di-pormal nga pagpanaksi sa tion sang kombension. Ang mga manugbantala dapat magdala sing isa ukon duha sini nga pormas sa kombension. Ang nasulatan nga mga pormas mahimo ihatag sa Book Room ukon sa sekretaryo sang inyo kongregasyon.—Tan-awa ang Nobiembre 2009 nga Ang Aton Ministeryo sa Ginharian, pahina 4.
◼ Restawran: Padunggi ang ngalan ni Jehova paagi sa inyo maayo nga paggawi sa mga restawran. Maghatag sing tip kon kinabatasan ini sa inyo lugar.
◼ Badge Card: Palihug isuksok ang inyo badge card samtang yara sa kombension kag kon nagalakbay pakadto-pakari sa duog sang kombension. Makuha ninyo ini sa inyo kongregasyon. Indi kamo dapat magpabuyanbuyan sa pagkuha sini para sa inyo kag sa katapo sang inyo pamilya.
◼ Bawtismo: Ang mga kandidato sa bawtismo dapat magpungko sa pulungkuan nga gin-aman para sa ila antes magsugod ang programa sa Sabado sang aga. Ang kada isa dapat magdala sing maugdang nga pangpaligo nga bayo kag tualya. Agod mapat-od nga nagakaigo ang panapton sang mga balawtismuhan, dapat ini binagbinagon sa ila sang mga gulang nga magarepaso sang mga pamangkot sa Organisado nga libro.
◼ Pagboluntaryo: Madugangan pa gid ang aton kalipay sa pagtambong sa kombension kon magboluntaryo kita sa mga hilikuton. (Binu. 20:35) Ang bisan sin-o nga luyag magboluntaryo dapat magreport sa Volunteer Service Department sang kombension. Ang mga kabataan nga wala pa nagaedad sing 16 anyos mahimo magboluntaryo upod sa ila ginikanan, guardian, ukon iban pa nga adulto nga ginsaligan sang ila mga ginikanan ukon guardian.
[Kahon sa pahina 3]
Paano Naton Itanyag ang Imbitasyon?
Agod makobrehan ang madamo nga teritoryo, dapat naton lip-uton ang aton presentasyon. Mahimo kita magsiling: “Kamusta. Nagapakigbahin kami sa bug-os kalibutan nga pagpanagtag sini nga imbitasyon. Ari ang imo kopya. Mabasa mo dira ang dugang pa nga detalye.” Ang panghapin sang imbitasyon makapukaw sang interes, gani dapat makita ini sang tagbalay samtang ginadaho mo sa iya. Mangin mapagsik. Kon nagapanagtag sang imbitasyon sa Sabado ukon Domingo, itanyag man ang mga magasin kon nagakaigo.