Pamangkot

◼ Nagakaigo bala nga gamiton sang kongregasyon ukon sang indibiduwal ang mga logo sang legal nga mga korporasyon sang mga Saksi ni Jehova?

Ang logo isa ka ngalan, simbulo, ukon trademark nga gindesinyo agod madali makilala sing espesipiko ang isa ka organisasyon. Ginarepresentar sang Watch Tower nga logo ang Watch Tower Bible and Tract Society of Pennsylvania kag ang iban pa nga korporasyon nga ginagamit sang organisasyon. Ginagamit sang Cristianong Kongregasyon sang mga Saksi ni Jehova ang nakabukas nga Biblia subong logo sa ila mga sulat. Lainlain ang mga logo sang iban nga korporasyon nga ginagamit sang mga Saksi ni Jehova.

Indi dapat paggamiton sang mga kongregasyon ukon sang mga indibiduwal sa ila Kingdom Hall, karatula, mga sulat, personal nga mga kagamitan, kag iban pa ang mga logo kag ngalan, ukon kaanggid sini nga mga logo, sang legal nga mga korporasyon sang organisasyon. Ang paggamit sang mga logo sang organisasyon mahimo magpagumon sa mga opisyal, manugbantala, kag iban pa tuhoy sa legal nga kaangtanan sang kongregasyon sa mga korporasyon sang organisasyon. Sing kaanggid, mahimo masal-an ang mga sulat subong gin-aprobahan ukon ginpadala sang ulong talatapan ukon sang sanga talatapan.

Ang Watch Tower nga logo, ukon ang kaanggid sini, indi dapat paggamiton sa ulihi nga mga proyekto sang pagpanukod sang mga Kingdom Hall bisan pa ginapanag-iyahan ini sang Watch Tower. Indi kinahanglan nga bag-uhon gilayon ang karatula ukon desinyo sang mga Kingdom Hall nga may amo sini nga logo kon nagakinahanglan ini sing daku nga pagbag-o, tion, panikasog, kag gasto. Apang, mahimo binagbinagon ang himuon nga mga pagbag-o kon gamay lang ini kag wala nagakinahanglan sing daku nga panikasog. Kon daku ang ginakinahanglan nga pagbag-o, mahimo ini himuon sa tion sang pagkay-o sa Kingdom Hall ukon karatula.