Magtudlo sa Simple nga Paagi
1. Ano ang aton himuon agod mangin maathag kag epektibo ang aton pagpanudlo?
1 Ang pagkasimple importante gid sa pagtudlo sing epektibo. Ang pagbinagbinag sa paagi sang pagtudlo sang Daku nga Manunudlo nga si Jesus makabulig sa aton nga mapauswag ang aton “kalantip sa pagpanudlo.”—2 Tim. 4:2; Juan 13:13.
2. Paano kita makatudlo sa simple nga paagi, kag ano ang epekto sina nga pagtudlo?
2 Magtudlo sing Simple: Ang Sermon sa Bukid nagaunod sang labing madalom nga mga kamatuoran nga gintudlo sang isa ka tawo, apang ginpabutyag ini sa simple lang nga paagi. (Mat., kap. 5-7) Ang kadam-an nga nagapamati kay Jesus “nahayanghag sa iya paagi sang pagpanudlo.” Ang mga opisyal nga ginpadala agod dakpon kuntani sia napahulag sa pagsiling: “Wala pa gid sing tawo nga nakahambal kaangay sini.” (Mat. 7:28, 29; Juan 7:46) Indi kinahanglan nga maggamit kita sing madalom nga mga tinaga, komplikado nga mga dinalan, ukon detalyado katama nga mga ilustrasyon agod makumbinsi ang iban sa kamatuoran. Ang kamatuoran mahimo mapaathag sa simple nga mga termino.
3. Ngaa ginapatam-an sang iban sing impormasyon ang ila tagpalamati, kag paano ini malikawan?
3 Kon Ano Kadamo ang Dapat Itudlo: Ang kadamuon sang impormasyon nga ginpaalinton ni Jesus nagadepende sa kon sin-o ang iya tagpalamati. (Juan 16:12) Dapat kita mangin mapanilagon kag mapasibusibuon, ilabi na kon nagapanaksi kita sa aton mga paryente, sa bag-uhan nga mga interesado, ukon sa mga kabataan. Dapat indi naton pagpasobrahan sing impormasyon ang aton tagpalamati bisan pa daw nagapamati sila sing maayo. Kon bunayag sila sing tagipusuon magapadayon sila sa pagkuha sing ihibalo tuhoy sa matuod nga Dios, si Jehova.—Juan 17:3; 1 Cor. 3:6.
4. Ngaa maayo nga magkonsentrar kita sa panguna nga mga punto sa baylo nga sa mga detalye?
4 Magkonsentrar sa Panguna nga mga Punto: Wala ni Jesus ginhimo nga komplikado ang iya panudlo paagi sa paglakip sing tuman ka damo nga mga detalye. Sang nagsiling sia: “Ang tanan nga yara sa handumanan nga mga lulubngan . . . magagua,” wala niya ginpaathag ang mga detalye tuhoy sa duha ka paglaum sang mga pagabanhawon. (Juan 5:28, 29) Kon nagadumala kita sang mga pagtuon sa Biblia, dapat magkonsentrar kita sa panguna nga mga punto kag likawan nga ilakip ang wala ginbinagbinag sa publikasyon.
5. Ano nga pagpakamaayo ang matigayon naton kon nagatudlo kita sa simple nga paagi?
5 Mapinasalamaton gid kita nga gintudluan kita ni Jehova sa simple nga paagi sang tanan nga dapat naton mahibaluan! (Mat. 11:25) Kabay nga tudluan man naton ang iban sa simple nga paagi kag sa amo mangin mabungahon ang aton ministeryo.