Tatlo ka Paagi nga Mapauswag ang Imo Pagtudlo

1. Ngaa dapat naton pauswagon ang aton paagi sa pagtudlo?

¹ Ang tanan nga Cristianong ministro mga manunudlo. Nagabantala man kita, nagaduaw liwat sa mga nagpakita sing interes, ukon nagadumala sing pagtuon sa Biblia, nagapaambit kita sing impormasyon. Ini nga impormasyon pinasahi gid kay ginapaiwag naton ang kapawa sang “balaan nga mga sinulatan,” nga ‘makapaalam para sa kaluwasan.’ (2 Tim. 3:15) Isa gid ini ka pribilehiyo! May tatlo ka paagi nga mapauswag naton ang aton pagtudlo.

2. Paano mangin simple ang aton panudlo?

² Simple: Kon kabisado naton ang topiko, basi malipat kita nga mahimo mabudlayan sa paghangop ang aton ginatun-an sa Biblia. Gani indi sia paghatagi sing tama kadamo kag indi kinahanglanon nga impormasyon. Sa baylo, hinambiti lang ang importante nga mga punto. Indi kinahanglan nga madamo ka sing ihambal para mangin maayo nga manunudlo. (Hulu. 10:19) Sa masami maayo nga basahon lang ang panguna nga mga teksto. Pagkatapos mabasa ang teksto, padakua lang ang bahin sini nga may labot sa topiko. Ang Sermon sa Bukid nga mabasa sa Mateo kapitulo 5 asta 7 nagaunod sing importante nga mga kamatuoran nga gintudlo ni Jesus. Pero naggamit sia sing simple kag ginpili sing maayo nga mga tinaga.

3. Ano ang kapuslanan sang mga ilustrasyon, kag ano nga sahi ang epektibo?

³ Paggamit sing mga ilustrasyon: Ang mga ilustrasyon nagapahulag sang hunahuna kag balatyagon kag nagabulig ini para indi naton malipatan ang aton nabatian. Indi man kinahanglan nga madamo ka gid sing nahibaluan nga istorya para makahimo sing maayo nga mga ilustrasyon. Sa masami nagagamit si Jesus sing malip-ot, kag indi komplikado nga mga ilustrasyon. (Mat. 7:3-5; 18:2-4) Ang pagdrowing sing simple nga mga laragway makabulig man. Kon maghanda ka sing maayo, makahimo ka sing epektibo nga mga ilustrasyon.

4. Paano naton magamit sing epektibo ang mga pamangkot?

⁴ Paggamit sing mga pamangkot: Ang mga pamangkot makapahunahuna sa imo estudyante. Gani kon mamangkot ka, pamatii anay ang iya sabat. Kon ikaw ang magsabat sang imo pamangkot, indi mo mahibaluan kon ano ang naintiendihan sang imo estudyante. Kon sala ang iya sabat, pamangkuta sia liwat asta mahangpan niya ini sa baylo nga tadlungon lang sia. (Mat. 17:24-27) Siempre wala sing perpekto nga manunudlo. Gani, ginapalig-on kita sang Biblia nga hatagan naton sing igtalupangod ang aton pagpanudlo. Kon sundon naton ini, makabenepisyo gid kita pati na ang mga nagapamati sa aton.—1 Tim. 4:16.