Ang Aton Ministeryo—Nagapabanaag sang Aton Gugma sa Dios
1. Paano ginpahulag si Jesus sang iya gugma sa Dios?
1 Gugma ang nagpahulag kay Jesus nga tumanon ang iya ministeryo. Ang tanan nga bahin sang ministeryo ni Jesus nagapamatuod gid sang iya gugma kay Jehova. Si Jesus nagsiling: “Agod mahibaluan sang kalibutan nga ginahigugma ko ang Amay, ginahimo ko ang suno sa sugo nga ginhatag sang Amay sa akon.” (Juan 14:31) Subong mga sumulunod ni Jesus, pribilehiyo man naton nga ipabanaag ang aton tudok nga gugma sa Dios sa aton ministeryo.—Mat. 22:37; Efe. 5:1, 2.
2. Paano ang aton gugma kay Jehova makaapektar sa aton ministeryo?
2 “Pakabalaanon ang Imo Ngalan”: Kon makugi naton nga ginapanginpuslan ang tagsa ka kahigayunan nga isugid sa iban ang tuhoy kay Jehova kag sa iya Ginharian, ginapakita naton nga ginahigugma naton ang Dios kag nagapakigbahin kita sa pagpakabalaan sa iya ngalan. (Sal. 83:18; Ezeq. 36:23; Mat. 6:9) Kaangay ni Jesus, ang aton ministeryo mangin dalayon nga pagpabanaag sang aton hanuot nga handum nga mapakabalaan ang ngalan ni Jehova kag matuman ang iya kabubut-on.—Mat. 26:39.
3. Sa ano nga paagi ang aton gugma kay Jehova nagabulig sa aton nga malampuwasan ang mga balagbag?
3 Ang Gugma Nagabulig sa Aton nga Malampuwasan ang mga Balagbag: Ang gugma kay Jehova nagalandas sang tanan nga balagbag. (1 Cor. 13:4, 7) Nakaatubang si Jesus sing pila ka kahimtangan nga mahimo kuntani nagpaluya sa iya sa pagtuman sang iya ministeryo. Apang, sang nakaatubang sia sang mga balagbag, nalandas niya ini bangod sang iya tudok nga gugma kag handum nga himuon ang kabubut-on ni Jehova. (Mar. 3:21; 1 Ped. 2:18-23) Nagaatubang man kita sang madamo nga kabudlayan, apang ang aton gugma sa Dios makabulig sa aton nga malampuwasan ina. Paagi sa pagsunod sing maayo sa halimbawa ni Cristo, makatigayon kita sing kompiansa kag kalig-on sa pagtuman sang aton ministeryo. Walay sapayan sang pagpamatok sang aton pamilya, maluya nga panglawas, katigulangon, ukon di-pagsapak sang kalabanan nga tawo, wala kita nagauntat sa pagpakita sang aton gugma kay Jehova paagi sa pagtuman sang aton ministeryo sa pinakamaayo naton nga mahimo.
4. Ano ang aton pribilehiyo sa pagpakita sing gugma kay Jehova?
4 Ang gugma gamhanan, kag isa gid ka pribilehiyo nga mapabanaag naton ang aton bug-os kalag nga gugma sa Dios sa aton ministeryo. (1 Cor. 13:13) Samtang nagahilapit na kita sa tion nga pakabalaanon ang ngalan ni Jehova sing permanente, ‘kabay nga ang aton gugma magbugana sing labi pa gid.’—Fil. 1:9; Mat. 22:36-38.