Mangin Atentibo sa Sagrado nga mga Pahayag
1 Indi tanan nga ginahambal sang tawo nagakabagay sing pinasahi nga igtalupangod. Apang kon nagahambal ang Dios, may importante nga rason agod magpamati. (Deut. 28:1, 2) Sing mapasalamaton, ang inspirado nga mga manunulat nagrekord sang “sagrado nga mga pahayag sang Dios” para sa aton kaayuhan. (Roma 3:2) Ang palaabuton nga distrito nga kombension magahatag sing hamili nga mga kahigayunan agod mabatian ining mga pahayag samtang ginabasa ini kag ginabinagbinag. Paano ka ilabi na nga mangin atentibo?
2 Mag-abot sing Maaga Kada Aga: Handurawa ang kakunyag sang mga Israelinhon sang ginsugo sila nga sug-alawon si Jehova sa Bukid Sinai sa pagpamati sang iya Kasuguan! (Ex. 19:10, 11, 16-19) Kon amo man sini ang imo panimuot sa pagbaton sing instruksion ni Jehova sa distrito nga kombension, magahimo ikaw sing mga kahimusan agod mag-abot sing maaga kada adlaw. Indi naton mabatian ang bug-os nga programa kon mag-abot kita sing ulihi kag matublag ang iban sa aton mga panikasog sa pagpangita sing mga pulungkuan.
3 Bisan ang iban nga nagaabot sing maaga wala sa ila mga pulungkuan sa pagsugod sang sesyon. Ngaa amo sini? Nagahulat sila tubtob mahatag sang tsirman ang nagabukas nga ambahanon antes sila mag-untat sa pagpakigsugilanon sa mga abyan kag magsugod sa pagpakadto sa ila mga pulungkuan. Dapat naton tandaan nga pila ka minuto antes sang nagabukas nga ambahanon sang tagsa ka sesyon, ang tsirman nagalingkod sa plataporma samtang ginapatokar ang Kingdom music. Tanda ini nga tion na sa paglingkod! Nian, sa paglawag sang nagabukas nga ambahanon, handa na kita sa pagbuylog sa pag-amba sing mga pagdayaw kay Jehova.
4 Magpamati Subong Isa ka Nahiusa nga Pamilya: Sang ang sagrado nga mga pahayag ginbasa sa nagtipon nga mga Israelinhon, ang mga pamilya, pati na ang “magagmay nga mga kabataan,” dapat magpamati kag magtuon. (Deut. 31:12) Sa aton mga kombension, ang mga bata indi dapat ‘pagpabayaan.’ (Hulu. 29:15) Mga ginikanan, maghimo sing kahimusan nga ang inyo bug-os nga pamilya magalingkod sing ulupod—pati na ang mga tin-edyer. Ang iban nga mga ginikanan nagahulat tubtob sa pag-amba sang nagabukas nga ambahanon agod dalhon ang ila mga anak sa kasilyas. Apang, indi gid ini makatudlo sa mga kabataan sang daku nga importansia sang mga ambahanon kag mga pangamuyo sa aton pagsimba. Daw ano gid kaayo nga pakadtuon sila sa kasilyas sa wala pa magsugod ang tagsa ka sesyon kon mahimo!
5 Makapamati kita sing maayo kon nakapahuway kita sing nagakaigo kada gab-i kag indi busog kaayo sa sina nga adlaw. Magkonsentrar sa ginasiling sang humalambal. Indi pagpalagawa ang imo hunahuna. Sundi sa Biblia samtang ginabasa ang mga kasulatan. Magkuha sing malip-ot nga mga nota. Samtang ginahatag ang tagsa ka pamulongpulong, repasuha sa imo hunahuna ang ginasiling sang humalambal, kag binagbinaga kon paano mo iaplikar ang materyal. Pagkatapos sang isa ka adlaw, hinun-anuni ang programa subong isa ka pamilya. Ano nga mga punto ang nabatian sang kada isa? Paano maaplikar sang inyo pamilya ini nga impormasyon?
6 Magpakita sing Pagtahod sa Pulong sang Dios: Ang mga kombension nagahatag sa aton sing maayo nga kahigayunan agod masugilanon ang mga abyan kag maagom ang makapalig-on nga pag-inupdanay. Paagi sa pag-abot sing maaga, may tion kita sa pagpakigsugilanon antes magsugod ang programa. Apang, ang iban nagasugilanunay sa tion sang programa, nagahunahuna sing sayop nga wala ini nagatublag sa daku nga awditoryum. Bisan pa ang mga miting ginahiwat sa daku nga lugar, tion ini sa pagpamati subong sang kon nagatambong sing miting sa Kingdom Hall. Ang paggamit sing mga cellular phone, pager, camcorder, kag kamera indi dapat pagtugutan sa pagtublag sa tion sang programa.
7 Sang ginbaton ni Moises ang Kasuguan gikan kay Jehova, “wala sia magkaon sing tinapay kag wala sia mag-inom sing tubig.” (Ex. 34:28) Subong man, indi nagakaigo nga magkaon ukon mag-inom samtang may sesyon sang kombension. Kon wala sing serioso nga mga rason sa panglawas, maghulat tubtob sa “gintangdo nga tion” para sa sini.—Manugw. 3:1.
8 Sa pila ka kombension, yara gihapon ang problema tuhoy sa madamong kauturan kag bisan mga kabataan nga nagatipontipon sa mga koridor sa tion sang mga sesyon. Ang mga attendant hatagan sing instruksion nga pangabayon sila sa pagbalik sa awditoryum. Ang mga boluntaryo nga nagapangabudlay sa lainlain nga departamento dapat maglingkod upod sang tumalambong sa gilayon nga matapos ang ila trabaho. Kon ang mga boluntaryo wala ginhatagan sing kinahanglanon nga trabaho sa tion sang mga sesyon, dapat yara sila sa ila mga pulungkuan, nga nagapamati sa programa. Indi sila dapat magpabilin sing madugay sa mga departamento, nagasugilanunay samtang may programa.
9 Indi gid naton luyag nga mangin ‘mahabol sa aton igdulungog’ kon nagapamati sa Pulong sang Dios. (Heb. 5:11) Busa mamat-od kita sa pagpakita sing nagakaigo nga pagtahod paagi sa pagpamati sing atentibo samtang ang sagrado nga mga pahayag gikan kay Jehova ginabinagbinag sa aton palaabuton nga distrito nga kombension.