Mangin Maayo nga Kaupod sa Pagministeryo
1. Ano ang bentaha kon may kaupod kita sa pagministeryo?
1 Sang ginsugo ni Jesus ang iya 70 ka disipulo nga magbantala, “ginpadala [niya] sila sing tigduhaduha.” (Luc. 10:1) Pat-od nga ini nga kahimusan nakabulig kag nakapalig-on sa iya tagsa ka disipulo samtang nagabantala sila. Kon ginaupdan naton ang iban nga manugbantala sa pagministeryo, paano kita makabulig sa ila?
2. Kon nagapresentar ang aton kaupod, ano ang dapat naton himuon kag ngaa?
2 Paagi sa Pagpamati: Mamati sing maayo samtang nagapresentar ang imo kaupod. (Sant. 1:19) Kon may ginabasa nga teksto, sundi ini sa imo Biblia. Tuluka ang nagahambal, upod mo man ini ukon ang tagbalay. Kon nagapamati ka sing maayo sa paghambalanay, mahimo man mamati sing maayo ang tagbalay.
3. Sa ano nga sitwasyon mahimo kita maghambal?
3 Paagi sa Paghibalo Kon San-o Maghambal: Kon nagahambal ang aton kaupod, ginapadunggan naton sia paagi sa paghipos. (Roma 12:10) Indi kita dapat magsaligbat. Kon malipatan niya ang iya inughambal ukon kon mamatok ukon mamangkot ang tagbalay kag nagapangayo sia sing bulig sa aton, tinguhaan naton nga buligan sia sa iya ginapaathag imbes nga magbukas sing iban nga topiko. (Hulu. 16:23; Man. 3:1, 7) Kon maghambal kita, dapat nga makabulig ini sa pagpanaksi sang aton kaupod.—1 Cor. 14:8.
4. Paano kita mangin malipayon kag madinalag-on sa aton pagministeryo?
4 Sang natapos na sa pagbantala ang 35 ka pares nga disipulo, “nagbalik [sila] nga malipayon.” (Luc. 10:17) Mahimo man kita mangin malipayon kag madinalag-on sa aton pagministeryo kon mamati kita sing maayo kag hibaluon kon san-o kita dapat maghambal agod buligan ang aton kaupod.