Simple Bala ang Imo Mata?

1. Ano ang buot silingon sang ‘mata nga simple’?

¹ Ang aton ginatan-aw nagaimpluwensia sa aton mga ginahimo. Nagakaigo gid ang ginsiling ni Jesus: “Nian, kon ang imo mata simple, ang imo bug-os nga lawas mangin masanag!” (Mat. 6:22) Kon ang aton mata “simple,” nasentro ini sa isa lang ka katuyuan—ang paghimo sang kabubut-on sang Dios. Ginauna naton ang Ginharian kag wala naton ginatugutan ang materyal nga mga butang ukon mga hilikuton nga mag-upang sa aton ministeryo.

2. Ano ang makatublag sa aton pagtamod, pero ano ang makabulig sa aton?

² Kinahanglan ang Pag-usisa sa Kaugalingon: Ang aton pagtamod mahimo matublag paagi sa ginasugid sa aton sang mga pasayod ukon sang mga natigayon sang iban. Antes tinguhaan ukon baklon ang isa ka butang nga nagakinahanglan sang daku nga tion, kuarta, ukon kusog, mas maayo kon ‘sumahon ang kagastuhanan’ paagi sa pagpamangkot sa kaugalingon, ‘Makabulig bala ini ukon maka-upang sa akon pag-alagad kay Jehova?’ (Luc. 14:28; Fil. 1:9-11) Mas maayo man kon sa tion kag tion usisaon naton ang aton kaugalingon kon paano pa gid naton mapasimple ang aton kabuhi kag madugangan ang aton tion sa pagministeryo.—2 Cor. 13:5; Efe. 5:10.

3. Ano ang aton matun-an sa isa ka utod nga nagpasimple sang iya kabuhi?

³ Sang nagsugod sa pagregular payunir ang isa ka utod nga babayi, nagpabilin gihapon sia sa iya bug-os tion nga trabaho bisan pa maaman na niya ang iya kinahanglanon kon part-time lang ang iya trabaho. Sang ulihi nagsiling sia: “Imposible nga magpaulipon sa duha ka agalon. Kinahanglan ko isakripisyo ang akon mga nagustuhan para maaman ang akon mga kinahanglanon. Narealisar ko nga wala nagadugay ang materyal nga mga butang kag kapuyon lang ako sa paghingamo sini.” Gintugutan sia sang iya mga kahimtangan nga pasimplehon ang iya kabuhi kag nangita sia sing bag-o nga trabaho para makapadayon sa pagpayunir.

4. Ngaa importante nga huptan naton karon nga simple ang aton mata?

⁴ Bangod hilingagawon ang aton tion, importante gid nga huptan naton nga simple ang aton mata. Sa pagligad sang tagsa ka adlaw, nagalapit kita sa katapusan sang sistema sang mga butang kag sa bag-ong kalibutan sang Dios. (1 Cor. 7:29, 31) Paagi sa pagsentro sang aton igtalupangod sa pagbantala, maluwas naton ang aton kaugalingon kag ang mga nagapamati sa aton.—1 Tim. 4:16.