Mangin Handa Pirme nga Tudluan ang mga Tawo nga Mangin Disipulo
1. Ano ang kinahanglan agod maluwas ang mga tawo?
1 Ginapakita sang report sa 2014 nga tuig sang pag-alagad ang kakugi sang katawhan sang Dios kag ang ila determinasyon sa pagbantala sang maayong balita sang Ginharian. (Mat. 24:14) Paagi sa pamalaybalay nga hilikuton, pinasahi nga mga kampanya sa pagpanagtag sang mga tract kag imbitasyon, kag sang aton pangpubliko nga pagpanaksi, mas madamo nga tawo sa karon ang aton nasugiran sang mensahe sang Biblia. Pero, agod maluwas ang mga tawo, dapat naton sila buligan nga mangin disipulo ni Jesus paagi sa pagtuon sang Biblia sa ila.—1 Tim. 2:4.
2. Ano nga mga pamangkot ang makabulig sa aton nga mangin handa pirme sa pagtanyag sang pagtuon sa Biblia?
2 Mangin Handa Pirme sa Pagtanyag sang Pagtuon sa Biblia: Kon interesado ang isa ka tawo, ginasulat mo bala ang mga impormasyon kon paano sia makontak kag ginabalikan sia dayon agod makasugod sang pagtuon sa Biblia? San-o ka ulihi nga nagtanyag sang pagtuon sa Biblia sa una pa lang nga pagduaw? San-o ka ulihi nga nagtanyag sang pagtuon sa Biblia sa imo ruta sang magasin? Napatan-aw mo na bala sa imo katrabaho, kaeskwela, kaingod, paryente, kag iban pa nga kilala ang mga video nga Ngaa Dapat Tun-an ang Biblia? kag Paano Ginahimo ang Pagtuon sa Biblia? Kon nagapakigbahin ka sa pangpubliko nga pagpanaksi kag may tawo nga nagkuha sang publikasyon nga ginagamit sa pagtuon, ginasilingan mo bala sia nga nagahiwat kita sing libre nga pagtuon sa Biblia gamit ang publikasyon nga iya ginkuha?
3. Ano ang dapat himuon agod matudlo naton ang kamatuoran sing madinalag-on?
3 Nagabulig si Jehova kag si Jesus: Ginsugdan ni Jesus ang iya sugo nga ‘tudluan ang mga tawo nga mangin disipulo’ paagi sa pagsiling nga “kadtui.” Gani ginpadaku niya nga dapat kita manikasog kag mangita sing paagi. Pero, wala niya kita ginapabay-an kay nagsaad sia nga updan niya kita. (Mat. 28:19, 20) Dugang pa, ginahatag ni Jehova ang iya balaan nga espiritu, ginaamanan kita sing mga gamit, kag ginahanas agod matudlo naton sa mga tawo ang kamatuoran. (Zac. 4:6; 2 Cor. 4:7) Makapangamuyo kita para sa “handum kag kusog” agod makapakigbahin kita sa sining importante nga hilikuton.—Fil. 2:13.
4. Ngaa dapat mangin handa kita pirme nga tudluan ang mga tawo nga mangin disipulo?
4 Nalipay gid kita sa pagbantala sang maayong balita. Pero, nagadugang ang aton kalipay kon may ginatudluan kita sang kamatuoran kag mabuligan sia nga mag-upod sa aton sa “dalan nga nagapadulong sa kabuhi.” (Mat. 7:14; 1 Tes. 2:19, 20) Labaw sa tanan, kon handa kita pirme nga tudluan ang mga tawo nga mangin disipulo, mapahamut-an naton si Jehova kay “indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.”—2 Ped. 3:9.