Ang Aton Prioridad
1. Paano ginpakita ni Jesus nga importante para sa iya ang ministeryo?
1 Ang ministeryo amo ang prioridad ni Jesus. Nangabudlay gid sia, naglakat sing ginatos ka kilometro sa bug-os nga Palestina sa pagbantala sa madamo nga tawo tubtob sa iya masarangan. Ginhuptan niya nga simple ang iya kabuhi para mas madamo sia sing tion kag atension sa ministeryo. (Mat. 8:20) Sang ginpunggan sia sang kadam-an nga magpabilin para ayuhon ang ila mga balatianon, nagsiling sia: “Sa iban man nga mga siudad dapat ko ibantala ang maayong balita sang ginharian sang Dios, kay tungod sini ginpadala ako.”—Luc. 4:43.
2. Ngaa importante gid kay Jesus ang ministeryo?
2 Ngaa importante gid kay Jesus ang ministeryo? Ang iya panguna nga ginkabalak-an amo ang pagpakabalaan sa ngalan ni Jehova. (Mat. 6:9) Ginhigugma niya ang iya langitnon nga Amay kag handum gid niya nga tumanon ang Iya kabubut-on kag Iya tanan nga kasuguan. (Juan 14:31) Isa pa, nagaulikid gid sia sa mga tawo kag luyag niya sila buligan.—Mat. 9:36, 37.
3. Paano naton mapakita nga prioridad naton ang ministeryo?
3 Iluga si Jesus: Ang pag-ilog sa pagtamod ni Jesus sa ministeryo mahimo nga mabudlay bangod sang aton kasakuon sa mga buluhaton kag madamo nga tublag sang kalibutan. (Mat. 24:37-39; Luc. 21:34) Gani, dapat naton pat-uron ang mas importante nga mga butang, nga nagaiskedyul sa paghanda kag pagpakigbahin sa pagbantala sing regular. (Fil. 1:10) Ginatinguhaan naton nga huptan ang simple nga kabuhi kag wala ginagamit sing bug-os ang kalibutan.—1 Cor. 7:31.
4. Ngaa importante nga huptan naton ang nagakaigo nga prioridad karon?
4 Kon limitado lang ang tion, ginauna sang maalam nga tawo kon ano ang importante. Halimbawa, kon mahibaluan niya nga may mag-abot nga bagyo, nagahinguyang sia sing tion kag kusog sa paghanda para mangin luwas sa katalagman ang iya pamilya kag paandaman ang iya mga kaingod. Ginapaiway niya ang indi tanto ka importante nga mga buluhaton. Malip-ot na lang ang tion antes mag-abot ang Armagedon. (Sof. 1:14-16; 1 Cor. 7:29) Para maluwas naton ang aton kaugalingon kag ang mga nagapamati sa aton, dapat naton talupangdon pirme ang aton kaugalingon kag ang aton pagpanudlo, sa gua man ukon sa sulod sang kongregasyon. (1 Tim. 4:16) Huo, ang aton kaluwasan nagadepende sa pag-una naton sang aton ministeryo!