Aman Para sa Cristianong mga Ministro
1. Anong bag-o nga kahimusan ang ginsugdan sang 1938, kag ano ang katuyuan sini?
1 Sang 1938, ginsugdan sang organisasyon ni Jehova ang bag-o nga kahimusan. Gin-agda ang mga grupo sang mga kongregasyon nga magtambong sa mga zone assembly, nga ginatawag karon nga sirkito nga asembleya. Ano ang katuyuan sini? Ang Enero 1939 nga gua sang Informant (karon Ang Aton Ministeryo sa Ginharian) nagsabat: “Ini nga mga asembleya bahin sang Teokratikong Organisasyon ni Jehova para matuman ang mga hilikuton sang iya Ginharian. Ang mga instruksion nga gin-aman diri importante agod matuman sing nagakaigo sang kada isa ang ila asaynment.” Kon binagbinagon naton ang pagdamo sang mga manugbantala sang Ginharian gikan sa 58,000 sang 1938 tubtob sa kapin sa 7,000,000 sang 2010, maathag nga natuman ang katuyuan sang mga sirkito nga asembleya nga buligan ang mga ministro sa “ila asaynment”!
2. Ano nga mga impormasyon ang ipresentar sa aton masunod nga sirkito nga asembleya?
2 Tema Para sa Masunod nga Tuig: Nalangkag gid kita sa pagpalig-on nga aton matigayon sa masunod nga sirkito nga asembleya. Ang tema nga “Kamo Indi Bahin sang Kalibutan” ginkuha sa Juan 15:19. Ano ang pila sa mga pamulongpulong nga mabenepisyuhan sang Cristianong mga ministro? Sa Sabado, makabenepisyo kita sa pamulongpulong nga “Ang Bug-os Tion nga Pag-alagad Nagaamlig sa Aton—Paano?” Malipay man kita sa tatlo ka bahin nga simposium nga “Indi Magpaimpluwensia sa . . . ” “Mabangis nga Sapat,” “Dakung Makihilawason nga Babayi,” kag “Nagalakbay nga mga Manugpatikang.” Mabatian naton sa Domingo ang simposium nga “Higugmaa si Jehova, Indi ang Kalibutan.” Lakip man sa mga pamulongpulong ang “Magpadayon ‘Subong mga Dumuluong kag Umalagi nga mga Pumuluyo’” kag “Magpakaisog! Madaug Ninyo ang Kalibutan.”
3. Ano nga mga benepisyo ang aton matigayon sa pagtambong sa sirkito nga asembleya?
3 Pagkatapos nga nakatambong sa nagligad nga sirkito nga asembleya, ang isa ka utod nga babayi nga medyo nagluya sa ministeryo nagsulat nga napahulag sia sang programa agod usisaon liwat ang iya mga kahimtangan kag nangin determinado sia “nga makigbahin sa ministeryo kag indi na mangita sing balibad!” Pat-od gid nga ang programa sa masunod nga sirkito nga asembleya magabulig sa aton tanan nga higugmaon si Jehova imbes ang kalibutan. (1 Juan 2:15-17) Pat-ura nga makatambong ka kag mamati sing maayo agod makabenepisyo ka sing bug-os sa sining mahigugmaon nga aman para sa Cristianong mga ministro!