Bag-ong Brosyur nga Itanyag!
1. Ano ang itanyag naton sa Nobiembre, kag ano ang katuyuan sini nga brosyur?
1 Ginpagua sa “Magpadayon sa Pagbantay!” Distrito nga Kombension sang 2009 ang bag-ong brosyur nga natig-uluhan, Ang Biblia—Ano ang Mensahe Sini? Sa una nga higayon, itanyag ini sa Nobiembre sang mga kongregasyon sa bilog nga duta. Paano makabenepisyo ang mga tawo sa teritoryo sa sini nga brosyur? Kalabanan sang mga tawo, ilabi na ang mga indi Cristiano, halos wala sing nahibaluan sa Biblia. Gani ginapaathag sa pahina 3 sang brosyur nga gindesinyo ini para ‘mahibaluan ang panguna nga ginatudlo sang Biblia.’
2. Paano naton itanyag ang brosyur?
2 Kon Paano Ini Itanyag: Mahimo kita magsiling: “Gusto ko mahibaluan ang imo opinyon sa sini. [Basaha ang 2 Timoteo 3:16.] Madamo ako sang naistorya nga nagaugyon sa sini pero ang iban nagapati nga ang Biblia isa lang ka maayo nga libro. Ano ang masiling mo parte sa Biblia? [Tuguti sia sa pagsabat.] Ano man ang aton relihion, may maayo nga rason nga usisaon naton ang Biblia. [Basaha ang nagabukas nga parapo sa pahina 3.] Samtang ginabasa mo ang malip-ot nga sumaryo sa Biblia sa sini nga brosyur, may butang ka nga matun-an: Ang Biblia may isa lang ka kabug-usan nga tema kag mensahe.”
3. Ano ang isa pa ka presentasyon nga mahimo gamiton ilabi na sa teritoryo nga madamo sing indi Cristiano?
3 Yari ang isa pa ka pamaagi, ilabi na kon nagabantala sa mga indi Cristiano: “Gusto ko mahibaluan ang imo opinyon sa ginasiling sang Kasulatan (ukon sa sining sagrado nga libro). [Basaha ang Salmo 37:11.] Ano sa banta mo ang kahimtangan sa duta kon matuman ini nga tagna? [Tuguti sia sa pagsabat.] Halimbawa lamang ini sang paglaum kag lugpay nga ginasiling sang Biblia para sa mga tawo sang tanan nga kultura kag pagtuo.” Basaha ang parapo sa ibabaw sang pahina 3, kag itanyag ang brosyur.
4. Paano naton magamit ang brosyur sa pagsugod sing pagtuon sa Biblia?
4 Pagsugod sing Pagtuon sa Biblia: Sa aton pagbalik mahimo naton pahanumdumon ang tagbalay sa aton nagligad nga pag-istoryahanay kag binagbinagon ang isa ukon duha ka parapo sa topiko nga inyo ginhambalan, nga nagagamit sang mga pamangkot sa katapusan sang nagakaigo nga seksion. Ukon kon gusto naton itanyag ang Ginatudlo Sang Biblia nga libro, mahimo naton basahon sa iya ang likod nga pahina sang brosyur, ihatag sa iya ang libro, kag papilion kon ano nga kapitulo ang iya nagustuhan, kag binagbinagon ninyo ang isa ukon duha ka parapo sa kapitulo. Kabay pa nga bug-os kita nga makigbahin sa pagtanyag sini nga brosyur sa Nobiembre!