Ano ang Imo mga Pililian?
Nagadamo na karon ang ospital sa bug-os nga kalibutan nga nagaopera nga wala nagagamit sing dugo. Nahibaluan kag nahangpan mo bala ang mga sahi sang pagpabulong nga wala nagagamit sing dugo? Kinahanglan mahibaluan mo ini agod makahimo ka sing husto nga desisyon kon magpabulong ka ukon magpaopera. Tan-awa ang video nga No Blood—Medicine Meets the Challenge. Nian, mapinangamuyuon nga binagbinaga ang imo natun-an sa bulig sang masunod nga mga pamangkot.—Patalupangod: Bangod ining video may malip-ot nga mga eksena sa pag-opera, dapat pamensaron sing maayo sang mga ginikanan kon bala updon nila ang ila magagmay nga mga bata sa pagtan-aw sini.
(1) Ano ang panguna nga rason ngaa nagadumili sa pagpatughong sing dugo ang mga Saksi ni Jehova? (2) Kon tuhoy sa pagpabulong, ano ang luyag sang mga Saksi ni Jehova? (3) Ano ang sadsaran nga kinamatarong sang mga pasyente? (4) Ngaa rasonable kag responsable nga magpili sing mga tal-us sa pagtughong sing dugo? (5) Kon madamo katama nga dugo ang nadula, ano ang duha ka butang nga dapat gilayon nga himuon sang mga doktor? (6) Ano ang apat ka prinsipio sa estratehiya sang tal-us sa pagtughong sing dugo? (7) Paano sang mga doktor (a) makontrol ang pagdugo, (b) matipigan ang pula nga selula nga dugo, (c) mapadasig ang pagpatubas sing dugo, kag (d) mapasag-uli ang nadula nga dugo? (8) Ilaragway ang (a) hemodilution kag (b) cell salvage. (9) Ano ang dapat mo mahibaluan tuhoy sa mga tal-us sa pagtughong sing dugo? (10) Sarang bala mahimo ang delikado kag komplikado nga mga operasyon bisan wala sing pagtughong sing dugo? (11) Ano nga pag-uswag ang nagakatabo sa patag sang medisina?
Ang pagbaton sang pila ka pamaagi sang pagbulong nga ginpakita sa video nagadepende sa nahanas sa Biblia nga konsiensia sang kada indibiduwal. May napili ka na bala kon ano nga pamaagi sang pagpabulong ang batunon mo kag sang imo kabataan kag nasulat na ini sa DPA card? Para sa kompleto nga paghinun-anon tuhoy sa sining mga butang, repasuha sing maayo ang “Mga Pamangkot Gikan sa mga Bumalasa” sa Hunyo 15, 2004, kag Oktubre 15, 2000 nga mga gua sang Ang Lalantawan. Nian gamita ang mga work sheet sa suplemento sang Enero 2007 nga Ang Aton Ministeryo sa Ginharian nga “Paano Ko Tamdon ang mga Bahin Sang Dugo kag ang mga Pagbulong nga Nagagamit Sang Akon Dugo?,” kon nagahimo sing personal nga mga desisyon tuhoy sa pamaagi sang pagbulong nga imo pilion ukon sikwayon. Pagkatapos sini, pat-ura nga masaylo mo ini sing sibu sa imo DPA card. Dapat mo ipaathag sing maayo sa imo mga health-care representative kag sa imo di-Saksi nga mga himata ang imo mga desisyon.