Ginapabuyanbuyanan Mo Bala Ini?
Ginapabuyanbuyanan ang ano? Ang pagsulat sa DPA (durable power of attorney) card nga gin-aman para sa bawtismado nga mga Saksi. Sanglit “wala kamo makahibalo kon mangin ano ang inyo kabuhi buas,” importante gid nga magdesisyon sing abanse kag isulat kon ano nga bulong kag pamaagi sa pagbulong ang batunon mo sa tion sang emerhensia. (Sant. 4:14; Binu. 15:28, 29) Agod mabuligan ka, ginhimo ang video nga Transfusion-Alternative Health Care—Meeting Patient Needs and Rights. Tan-awa ini, kag nian mapinangamuyuon nga repasuha kon ano ang imo nahangpan sa bulig sang mga pamangkot nga yara sa ubos.
(1) Ngaa ang pila ka doktor nag-usisa liwat tuhoy sa pagpatughong sing dugo? (2) Ano ang tatlo ka halimbawa sang masibod nga operasyon nga sarang mahimo nga wala sing pagtughong sing dugo? (3) Ngaa handa ang madamo nga doktor kag manug-opera sa bug-os nga kalibutan sa pagbulong nga wala nagatughong sing dugo? (4) Ano ang ginpakita sang mga pagtuon sang ospital sining karon lang tuhoy sa pagtughong sing dugo? (5) Ano ang mga risgo sa pagpatughong sing dugo? (6) Ano ang nahinakop sang madamo nga eksperto tuhoy sa kaayuhan sang mga alternatibo sa pagtughong sing dugo? (7) Ano ang ginatunaan sang anemia? Daw ano kanubo nga hemoglobin ang masarangan sang tawo? Ano ang puede himuon agod mabuligan ang pasyente nga may anemia? (8) Paano mapadamo ang pula nga selula sa dugo sang pasyente? (9) Ano ang mga teknik agod mapahaganhagan ang pagdugo sa tion sang operasyon? (10) Ngaa importante para sa mga Cristiano nga mamat-od sing abanse kon ano nga pagbulong ang ila batunon nga wala nagadalahig sa dugo? Paano naton ini mahimo?
Ang pagbaton sang pila sa mga pagbulong nga ginpakita sa video isa ka butang nga dapat desisyunan sang kada isa suno sa iya nahanas sa Biblia nga konsiensia. Nakadesisyon ka na bala kon ano nga bulong kag pamaagi sa pagbulong ang para sa imo kag sa imo mga kabataan kag nasulat na ini sa imo DPA card? Para sa mas detalyado nga pagbinagbinag sa sini nga butang, repasuha sing maayo ang kapitulo 7 sang “Gugma Sang Dios” nga libro kag ang mga reperensia nga ginsambit. Tan-awa man ang suplemento sang Ang Aton Ministeryo sa Ginharian nga Enero 2007 nga natig-uluhan “Paano Ko Tamdon ang mga Bahin Sang Dugo kag ang mga Pagbulong nga Nagagamit Sang Akon Dugo?” Pat-ura nga ang imo desisyon nasulat sing sibu sa imo DPA card. Ang imo ginpili nga mangin mga tiglawas sa tion sang emerhensia kag ang mga di-Saksi nga katapo sang imo pamilya dapat nga makahibalo gid sing bug-os sa imo mga desisyon.
[Kahon sa pahina 2]
• Nadesisyunan mo na bala kon ano nga bulong kag pamaagi sang pagbulong ang imo batunon kag sang imo kabataan?
• Ginadala mo bala pirme ang imo DPA card agod magamit sa tion sang emerhensia?