“Pagpanaksi sing Maid-id Tuhoy sa Ginharian sang Dios”
1. Ano ang aton pagatun-an sa Pagtinuon sang Kongregasyon sa Biblia sugod sa semana sang Marso 14?
1 Sugod sa semana sang Marso 14, 2011, pagatun-an sang mga kongregasyon nga Cebuano, Hiligaynon, Iloko, kag Tagalog ang “Pagpanaksi sing Maid-id Tuhoy sa Ginharian sang Dios” sa Pagtinuon sang Kongregasyon sa Biblia. (Patalupangod: ang mga kongregasyon nga Bicol, Pangasinan, kag Waray-Waray magatuon sang libro nga Mangin Suod kay Jehova suno sa ginpahibalo sa Ang Aton Ministeryo sa Ginharian sang Nobiembre.) Ginatuptupan sini nga libro ang tulun-an sang Binuhatan sa paagi nga mabatyagan sang bumalasa ang makakulunyag nga mga hitabo nga narekord diri. Imbes nga ipaathag sing bersikulo por bersikulo, ang Pagpanaksi nga libro magatudlo sing mga leksion gikan sa kasaysayan sang Binuhatan kag magabulig sa aton kon paano ini maaplikar.—Roma 15:4.
2. Ipaathag ang pila sa mga kaundan sang Pagpanaksi nga libro.
2 Kaundan sang Libro: Ang introduksion sa pahina 2 amo ang mahigugmaon nga sulat sang Nagadumala nga Hubon para ipabutyag nga luyag gid nila nga makabenepisyo kita sa sini nga libro. Sugod sa kapitulo 2, isa ka dinalan ang nagapaathag sang panguna nga punto sa kada kapitulo kag ang ginkutlo nga teksto nagapakita sang bahin sang Binuhatan nga pagabinagbinagon. Madamo nga kapitulo ang may mga kahon nga nagasugid sing mga impormasyon tuhoy sa mga tawo, lugar, ukon mga hitabo. May malapad ini nga marhin para masulatan sing mga nota. Madamo man ini sing detalyado nga laragway parte sa mga danyag sa Biblia agod mabuligan kita nga mahanduraw ang importante nga mga hitabo. May indese man ini sang mga laragway sa katapusan nga pahina para ipaathag kon ano ang ginapatuhuyan sang mga laragway. Makita sa likod sang una kag katapusan nga panghapin sang libro ang mga mapa agod masundan naton ang pag-uswag sang aton mga masigkasumilimba sang unang siglo samtang ginapalapnag nila ang maayong balita “tubtob sa ukbong sang duta.”—Binu. 1:8.
3. Anong importante nga mga pamangkot ang masabat sa aton pagtuon sa tulun-an sang Binuhatan?
3 Sabat sa Importante nga mga Pamangkot: Ang pagbinagbinag sa tulun-an sang Binuhatan magabulig sa aton nga mahangpan gid ang mga sabat sa importante nga mga pamangkot parte sa ministeryo. Halimbawa, ano nga hilikuton kag mensahe ang nagapakilala sa matuod nga sumulunod ni Jesucristo? Sin-o ang nagatuytoy sa bug-os kalibutan nga pagbantala, kag paano? Bangod sang paghingabot kag pagpamatok, ano nga mga kahigayunan ang mapamatud-an sang mga ministro? Ano ang papel sang balaan nga espiritu sa aton ministeryo?
4. Paano kita makabenepisyo sing maayo sa paghinun-anon sa sini nga libro?
4 Agod makabenepisyo sing maayo, tun-i sing abanse ang libro kag maghanda sa pagpakigbahin sa paghinun-anon. Tambungi ang tagsa ka pagtinuon, kag hunahunaa sing maayo kon paano mo maaplikar ang imo mga matun-an sa imo pagministeryo. Kabay pa nga mapalig-on kita nga magpanaksi sing maid-id tuhoy sa Ginharian sang Dios paagi sa paghinun-anon sa sini nga libro!—Binu. 28:23.