Iluga ang Ila Pagtuo
1. Ano ang tun-an naton sa Pagtinuon sang Kongregasyon sa Biblia sugod sa semana sang Oktubre 19?
1 Sugod sa semana sang Oktubre 19, 2015, tun-an naton ang libro nga Iluga ang Ila Pagtuo sa Pagtinuon sang Kongregasyon sa Biblia. Ini nga publikasyon nagabinagbinag sang kasaysayan sa Biblia sang 14 ka lalaki kag babayi nga nagpakita sing pagtuo. Ang paagi sa pagsulat sini nga libro magabulig sa aton nga mahanduraw nga matuod gid ini nga mga tawo nga nakaatubang sing mga kabudlayan samtang nagaalagad kay Jehova. Nagatudlo man ini sing mga leksion kag kon paano naton ini maaplikar sa aton tion.—Heb. 6:12.
2. Ano ang pila ka bahin sang libro nga Iluga ang Ila Pagtuo?
2 Mga Bahin: Makita sa sini nga libro ang time line kag mga mapa nga makabulig sa aton nga mahibaluan kon san-o kag sa diin nagkabuhi ang kada karakter. Dugang pa, ang kada kapitulo may bahin nga “Pamensari . . . ,” nga makabulig sa aton nga pamalandungan ang mga kasaysayan kag iaplikar ang praktikal nga mga leksion nga aton natun-an. Makita man sa sini nga libro ang matahom, detalyado, kag na-research sing maayo nga mga piktyur, nga makabulig sa aton nga mahanduraw ang mga kasaysayan sa Biblia.
3. Ano ang dapat naton himuon para makabenepisyo kita sa pagtuon sa sini nga libro?
3 Kon Paano Ka Makabenepisyo: Ang sulat halin sa Nagadumala nga Hubon nagapalig-on sa aton: “Gamita ang imo imahinasyon; ilakip ang imo igbalatyag. Tinguhai nga batyagon ang ginabatyag sang mga karakter, kag tan-awon ang ila nakita. Ipaanggid ang ila reaksion sa mga hitabo sa imo mangin reaksion.” Siempre, ang paggamit sang aton imahinasyon wala nagakahulugan nga maghaumhaum lang kita, sa baylo, handurawon naton ang kasaysayan sa Biblia kag batyagon ang kahimtangan sang mga karakter. Nagakinahanglan ini sing tion kag pagpamalandong. (Neh. 8:8) Kon ang leksion magaumpisa sa tungatunga sang kapitulo, sugdan sang konduktor ang pagtinuon paagi sa 30 asta 60 ka segundo nga pagrepaso sa natun-an sang nagligad. Kon wala nalakip sa naiskedyul nga tun-an ang bahin nga “Pamensari . . . ,” mahimo magpautwas sing isa ukon duha ka pamangkot bilang repaso sa pagtakop sang leksion.
4. Ngaa dapat naton tun-an ang libro nga Iluga ang Ila Pagtuo?
4 Nagakabuhi kita sa kalibutan nga padayon nga nagatinguha nga paluyahon ang aton pagtuo. Ini nga libro—subong man ang regular nga artikulo sa aton Ang Lalantawan diin ginbase ini nga libro—isa ka dulot halin kay Jehova agod buligan kita nga magbakod ang aton pagtuo. (Sant. 1:17) Panginpuslan naton ini sing bug-os paagi sa regular nga pagtambong sa Pagtinuon sang Kongregasyon sa Biblia kag pagpakigbahin sa pagkomento samtang ginatun-an naton sing tingob ini nga libro!