Handa Bala ang Imo Bata?
1. Ngaa kinahanglan naton ihanda ang aton kabataan?
1 Abre klase na. Mahimo makaatubang naman sing bag-o nga mga hangkat kag pag-ipit ang imo mga kabataan. May bag-o naman sila nga kahigayunan nga ‘makapanaksi sa kamatuoran.’ (Juan 18:37) Handa bala sila?
2. Agod mangin handa, ano dapat ang mahibaluan sang imo kabataan?
2 Nahangpan bala sang imo kabataan kon ano nga nasyonalistiko nga mga seremonya kag pagano nga mga selebrasyon ang indi nila dapat entrahan, kag ngaa? Handa bala sila kon ipiton sila nga magkuha sing mataas nga edukasyon, mag-date, kag mag-abuso sa alkohol ukon droga? Masiling lang bala sila nga indi ini puede sa ila relihion, ukon kabalo sila magpaathag sang mga rason?—1 Ped. 3:15.
3. Paano mahimo gamiton sang mga ginikanan ang ila Pangpamilya nga Pagsimba agod ihanda ang ila kabataan?
3 Gamita ang Inyo Pangpamilya nga Pagsimba: Siempre, puede ninyo binagbinagon ang problema sang inyo kabataan sa eskwelahan sa tion nga mag-utwas ini. Kon sa umpisa pa lang sang klase binagbinagon na ninyo ang mga problema nga mahimo maatubang sang inyo kabataan sa eskwelahan, makahatag ini sa ila sing kompiansa. Ngaa indi ninyo paggamiton ang inyo Pangpamilya nga Pagsimba para sa sini? Mahimo ninyo pamangkuton ang inyo kabataan kon ano gid ang ginakabalak-an nila sa sini nga tuig. Mahimo man ninyo repasuhon ang inyo ginbinagbinag sang nagligad nga mga tinuig, karon nga naghamtong na ang inyo kabataan kag nag-uswag na sa ila paghangop. (Sal. 119:95) Mahimo man kamo mag-ensayo nga kuno abi ikaw ang ila manunudlo, guidance counselor, ukon kaeskwela. Tudlui ang inyo kabataan kon paano magsabat gikan sa Biblia kag gamiton ang Reasoning kag Young People Ask nga mga libro. Gingamit sang isa ka iloy ang pag-ensayo para ihanda ang iya kabataan kon paano palapitan ang ila bag-o nga mga manunudlo sa umpisa sang klase kag ipahibalo nga mga Saksi ni Jehova sila.—Tan-awa ang Lalantawan, Disiembre 15, 2010, pahina 3-5.
4. Ano ang dapat himuon sang mga ginikanan?
4 Ang mga hangkat nga pagaatubangon sang Cristianong mga pamatan-on sa sining katapusan nga mga adlaw labi nga ‘magabudlay.’ (2 Tim. 3:1) Dapat hunahunaon ini sing abanse sang mga ginikanan. (Hulu. 22:3) Sa sini nga abre klase, himua ang imo labi nga masarangan para ihanda ang imo kabataan.