Handa Ka Bala nga Magpanaksi sa Eskwelahan?
1. Ano nga mga kahigayunan ang mahimo mo sa eskwelahan?
1 Bisan una pa lang ukon ikapila mo na nga tuig sa pag-eskwela, nagaatubang ka sang bag-o nga mga hangkat kag kabudlayan sa eskwelahan subong isa ka pamatan-on nga Cristiano. Apang may bag-o ka man nga mga kahigayunan nga ‘magpanaksi sa kamatuoran.’ (Juan 18:37) Handa ka na bala nga magpanaksi?
2. Ano nga mga paghanas ang makabulig sa imo nga maatubang ang mga hangkat sa eskwelahan?
2 Agod mabuligan ka nga mangin madinalag-on sa tanan nga bahin sang imo kabuhi, nakabaton ka sing paghanas gikan kay Jehova, sa imo mga ginikanan, kag sa matutom kag mainandamon nga ulipon. (Hulu. 1:8; 6:20; 23:23-25; Efe. 6:1-4; 2 Tim. 3:16, 17) Mangin handa nga manaksi. Makabulig sa imo ang mga paghanas nga imo nabaton kag ang ihibalo sa mga hangkat nga imo maatubang sa eskwelahan adlaw-adlaw. (Hulu. 22:3) Binagbinaga sing maayo ang mga instruksion kag ang base sa Biblia nga mga laygay nga makita sa duha ka tomo sang libro nga “Young People Ask” kag subong man sa kaanggid nga mga artikulo nga regular nga ginabalhag sa Magmata!
3. Sa ano nga mga paagi nga makapanaksi ka?
3 Madamo nga paagi nga makapanaksi ka sa imo pinasahi nga teritoryo. Kon matalupangdan sang iban ang imo maayo nga pamayo kag pamustura, ang imo pagginawi kag panghambal, ang imo pagkamatinahuron sa imo mga klasmeyt kag mga manunudlo, ang imo mga grado, kag bisan ang imo malig-on nga pagtamod sa kabuhi, mahimo mamangkot sila, “Ngaa lain ka sangsa iban?” (Mal. 3:18; Juan 15:19) Kahigayunan mo na ini nga makapanaksi kag ipaathag ang imo ginapatihan. (1 Tim. 2:9, 10) Sa bug-os nga tuig, mahimo maatubang mo ang mga hangkat tuhoy sa nasyonalismo nga mga seremonya kag mga kapiestahan. Kon pamangkuton ka kon ngaa wala ka nagaentra sa sini, masiling ka bala, “Supak ina sa akon relihion; Saksi ni Jehova ako,” ukon, gamiton mo bala ini nga kahigayunan nga makapanaksi tuhoy sa imo mahigugmaon nga Amay nga si Jehova? Ang maayo nga paghanda upod sa bulig ni Jehova amo ang magahanda sa imo nga makapanaksi sing maayo sa imo mga manunudlo, mga klasmeyt, kag sa iban pa.—1 Ped. 3:15.
4. Ngaa makasalig ikaw nga mangin madinalag-on ka sa pagpanaksi sa eskwelahan?
4 Bisan medyo makulbaan ka sa imo atubangon nga mga hangkat sang pagpanaksi sa eskwelahan, dumduma nga nalipay si Jehova sa imo mga panikasog. Nalangkag kami upod sa imo sa mga kahigayunan nga makapanaksi ka sa imo pinasahi nga teritoryo. Busa, mangin maisog kag handa nga magpanaksi samtang yara ka sa eskwelahan!