Ang Aton mga Magasin—Gindesinyo Para sa Tanan nga Sahi sang Tawo
1. Paano ginailog sang matutom kag mainandamon nga ulipon si apostol Pablo?
1 Subong nga ginpasibu ni apostol Pablo ang iya pagpresentar sang maayong balita agod maluwas ang “tanan nga sahi sang mga tawo,” ang matutom kag mainandamon nga ulipon nagagamit man sang aton mga magasin agod malab-ot ang mga tawo nga may lainlain nga ginhalinan kag ginapatihan. (1 Cor. 9:22, 23) Agod magamit naton sing maayo ang Lalantawan kag Magmata! dapat dumdumon naton kon para kay sin-o gindesinyo ini nga mga magasin.
2. Para kay sin-o gindesinyo ang Magmata!?
2 Magmata!: Ini nga magasin gindesinyo para malab-ot ang mga tawo nga pareho sa ginpatuhuyan anay ni apostol Pablo nga “mga tawo sang Atenas.” (Binu. 17:22) Yadto nga mga tawo indi mga Cristiano, kag diutay lang ang ila nahibaluan sa Kasulatan. Sing kaanggid, ang Magmata! gindesinyo man para sa mga tawo nga diutay lang ang nahibaluan sa Biblia. Mahimo wala sila sing nahibaluan tuhoy sa mga panudlo ni Cristo, wala sing salig sa relihion, ukon wala nila nahibaluan nga ang Biblia may praktikal nga balor. Ang panguna nga katuyuan sang Magmata! amo nga kumbinsihon ang mga bumalasa sini nga may ara matuod nga Dios. Katuyuan man sini nga magasin nga pabakuron ang pagpati sang mga bumalasa sa Biblia kag ipakita sa ila nga tuhay gid ang mga Saksi ni Jehova sa iban nga relihion.
3. Para kay sin-o gindesinyo ang tagsa ka edisyon sang Lalantawan?
3 Ang Lalantawan: Gindesinyo ang publiko nga edisyon sini nga magasin para sa mga tawo nga may pagtahod sa Dios kag sa Kasulatan. May nahibaluan sila sa Biblia apang indi sibu ang ila paghangop. Kaanggid sila sa mga tagpalamati ni Pablo nga ginpatuhuyan niya nga “nagakahadlok sa Dios.” (Binu. 13:14-16) Ang tulun-an nga edisyon sang Lalantawan panguna nga gindesinyo para sa mga Saksi ni Jehova. Ginpaabot ni Pablo nga ang magabasa sang iya mga sulat pamilyar na sa Kasulatan kag may sibu nga ihibalo sang kamatuoran. (1 Cor. 1:1, 2) Sing kaanggid, ang mga artikulo sa tulun-an nga edisyon ginsulat para sa mga nagatambong na sa aton mga miting kag pamilyar na sa mga termino kag mga panudlo sang mga Saksi.
4. Ngaa dapat mangin pamilyar kita sa kada isyu sang magasin nga ginagamit naton sa pagbantala?
4 Masami nga ginatanyag naton ang mga magasin sing pares, apang isa lang ang aton ginapresentar. Gani, dapat mangin pamilyar ka sa kada isyu. Sa amo, mahibaluan mo kon ano nga magasin ang bagay sa tawo nga imo ginaistorya.