‘Pakabalaana ang Ngalan sang Dios’
1. Ano ang tema sang sirkito nga asembleya sa 2012, kag ano ang basihan sini?
1 Isa ka daku nga pribilehiyo nga makilala kita sa ngalan sang Soberano sang Uniberso nga si Jehova! Sia mismo ang naghatag sa aton sang iya ngalan, kag sugod sang 1931, nakilala kita sa iya pinasahi nga ngalan subong mga Saksi ni Jehova. (Isa. 43:10) Ginpabaloran gid sang bugtong nga Anak sang Dios nga si Jesus ini nga ngalan amo kon ngaa una niya ini nga ginsambit sa iya modelo nga pangamuyo. (Mat. 6:9) Ang pinamulong ni Jesus amo ang ginbasihan sang tema sang aton sirkito nga asembleya sa 2012. Ini amo ang “Pakabalaana ang Ngalan sang Dios.”
2. Ano ang aton mapamatian sa aton sirkito nga asembleya?
2 Ang Aton Mapamatian: Sa Sabado, ang pamulongpulong nga “Ipakilala ang Ngalan sang Dios Subong Bug-os Tion nga mga Alagad” magabinagbinag kon ngaa ang bug-os tion nga pag-alagad nagaresulta sa makaalayaw nga pagkabuhi. Mapamatian man naton ang simposium nga “Mag-andam nga Indi Mapakahuy-an ang Ngalan ni Jehova,” nga magabulig sa aton nga malikawan ang apat ka siod. Ang mga pamangkot subong sang, Ano ang makabulig sa aton nga magbantala sing makugi bisan pa diutay lang ang interes sang mga tawo? kag, Ano ang makabulig sa aton nga matuman ang aton ministeryo sing epektibo kag mabungahon? pagasabton sa pamulongpulong nga “Kon Ngaa Dapat Pakabalaanon ang Ngalan sang Dios.” Sa Domingo, mapamatian naton ang apat sing bahin nga simposium kon paano naton mapakabalaan ang ngalan sang Dios paagi sa aton panghunahuna, panghambal, desisyon, kag paggawi. Maapresyar gid sang mga bag-uhan ang pamulongpulong publiko nga, “Pakabalaanon ni Jehova ang Iya Daku nga Ngalan sa Armagedon.”
3. Ano ang aton pribilehiyo, kag paano kita mabuligan sang programa sang sirkito nga asembleya?
3 Sa indi madugay, magahulag na si Jehova agod pakabalaanon ang iya ngalan. (Ezeq. 36:23) Samtang wala pa ini, may daku kita nga pribilehiyo nga sakdagon ang tanan nga ginarepresentar sang balaan nga ngalan ni Jehova. Nagasalig gid kita nga ining programa sang sirkito nga asembleya magabulig sa aton tanan nga matuman ang aton daku nga responsibilidad sa pagdala sang ngalan sang Dios.