Manginpulos Gikan sa Programa Sang Teokratikong Eskwelahan sa Pagministro sa 1999
1 Si Jesus isa ka Sampaton nga Manunudlo. Ang mga tawo ‘natingala sa iya paagi sang pagpanudlo.’ (Mar. 1:22) Walay sapayan nga wala sing isa sa aton ang makahambal kag makapanudlo sing subong kay Jesus, makapanikasog kita nga mailog sia. (Binu. 4:13) Bangod sina, ang aton pagpakigbahin sa programa sang Teokratikong Eskwelahan sa Pagministro magabulig sa aton nga mapauswag sing padayon ang aton mga ikasarang sa paghambal kag sa pagpanudlo.
2 Sa 1999, ang Asaynment Num. 1 ipasad labi na sa mga artikulo gikan sa 1997 nga Lalantawan kag Magmata! nga mga magasin. Ang aton paghangop sa espirituwal nga mga butang magauswag sing daku kon basahon naton sing abanse ini nga impormasyon kag nian pamatian ini sa programa sang eskwelahan. Ang mga gintangdo sa paghatag sining mga pamulongpulong sa pagpanudlo dapat magahatag sing praktikal nga aplikasyon sang materyal, nagapresentar sini sa makawiwili kag mapagsik nga paagi. Ang Asaynment Num. 3 ipasad sa Kalipay sa Pamilya nga libro, kag ang Asaynment Num. 4, sa isa ka karakter sa Biblia, bisan pa nga ang reperensia mahimo magabuslanay para sa sining mga asaynment. Dapat binagbinagon sing maayo sang manugtatap sang eskwelahan ang materyal antes itangdo ang mga bahin. Ang tanan nga estudyante nga gintangdo sa paghatag sing materyal gikan sa Kalipay sa Pamilya nga libro dapat nga huwaran sa ila mismo pagkabuhi sang pamilya.
3 Iaplikar ang Laygay, kag Maghanda Sing Maayo: Ang tanan mahimo pa nga mag-uswag sa arte sang paghambal kag pagpanudlo. (1 Tim. 4:13) Gani, dapat naton pangabudlayan ang laygay kag indi gid ini pagtamdon subong butang nga dapat likawan. (Hulu. 12:15; 19:20) Agod epektibo nga mapresentar ang kamatuoran sa mga miting kag sa ministeryo sa latagon, ang pagsaysay sa mga katunayan ukon pagbasa sa mga kasulatan indi dapat nga pakulahaw lamang. Kinahanglan naton lab-uton ang tagipusuon kag pahulagon ang mga nagapamati sa aton. Sarang naton ini mahimo paagi sa makapakumbinsi nga pagsugid sang kamatuoran sing tinagipusuon. (Ipaanggid ang Binuhatan 2:37.) Ang laygay nga mabaton naton sa eskwelahan magabulig sa aton agod mahimo ini.
4 Sa gilayon nga mabaton mo ang asaynment, hunahunaa ang mga kinaiya sa paghambal nga pangabudlayan mo suno sa ginapaathag sa School Guidebook. Binagbinaga kon ano ang dapat mo himuon agod mapadapat ang laygay nga nabaton mo sang nagligad. Pamalandungi ang imo tema, ang danyag nga gamiton mo kon kinahanglanon, kag kon paano mo ipadapat ang mga kasulatan nga masapwan sa imo gintangdo nga materyal. Binagbinaga kon paano mo magamit sa labing maayo nga paagi ang impormasyon sa pagtudlo kag sa pagpahulag.—1 Tim. 4:15, 16.
5 Kon nagapangalag-ag ka sa pagpalista sa eskwelahan, ipangamuyo ini kag nian ipakighambal ang imo balatyagon sa manugtatap sang eskwelahan. Ang tanan makapanginpulos paagi sa paghimulos sing bug-os sa programa nga ipresentar sa Teokratikong Eskwelahan sa Pagministro sa 1999.