Ang Pinakaimportante nga Kinaiya sang Maayo nga Manunudlo
1. Ano ang pinakaimportante nga kinaiya sang maayo nga manunudlo?
1 Ano ang nagahimo sa isa nga mangin maayo nga manunudlo sang Biblia? Ang iya bala sekular nga edukasyon, eksperiensia, ukon abilidad? Ang matuod, ini nga kinaiya amo ang katumanan sang Kasuguan, nagapakilala sa mga disipulo ni Jesus, kag ang nagapangibabaw kag labing makagalanyat sa mga kinaiya ni Jehova. (Juan 13:35; Gal. 5:14; 1 Juan 4:8) Ini amo ang gugma. Ang maayo nga manunudlo nagapakita sang gugma.
2. Ngaa importante nga may gugma kita sa mga tawo?
2 Gugma sa mga Tawo: Ang Daku nga Manunudlo nga si Jesus nagpakita sang gugma sa mga tawo, kag amo ini ang nagpahulag sa ila nga mamati sa iya. (Luc. 5:12, 13; Juan 13:1; 15:13) Kon nagakabalaka kita sa mga tawo, magapanaksi kita sa tagsa ka higayon. Ang mga paghingabot kag di-pagsapak indi makapauntat sa aton. Pakitaan naton ang aton ginabantalaan sang matuodtuod nga personal nga interes, kag ipasibu naton ang aton mga presentasyon sa ila mga ginakabalak-an. Handa kita maghinguyang sing tion indi lamang kon kaupod naton ang tagsa ka estudyante kundi pati na kon nagahanda kita sa tagsa ka pagtuon.
3. Paano ang gugma sa kamatuoran makabulig sa aton sa pagbantala?
3 Gugma sa Kamatuoran: Ginhigugma man ni Jesus ang mga kamatuoran sa Biblia kag ginkabig niya ini nga mga bahandi. (Mat. 13:52) Kon ginahigugma naton ang kamatuoran, magahambal kita nga may kapagsik agod mamati sing maayo ang mga tagpalamati. Ini nga gugma magabulig sa aton nga magkonsentrar sa importante nga impormasyon nga aton ginatudlo sa baylo nga sa aton mga kakulangan, kag magabuhin ini sang aton kakulba sa pagbantala.
4. Paano naton mapalambo ang gugma?
4 Palambua ang Gugma: Paano naton palambuon ang gugma sa mga tawo? Paagi sa pagpamalandong sa gugma nga ginpakita ni Jehova kag sang iya Anak kag sa makaluluoy nga kahimtangan sa espirituwal sang mga tawo sa aton teritoryo. (Mar. 6:34; 1 Juan 4:10, 11) Ang aton gugma sa kamatuoran magalambo paagi sa regular nga personal nga pagtuon kag pagpamalandong. Ang gugma isa ka aspekto sang bunga sang espiritu. (Gal. 5:22) Gani, makapangabay kita kay Jehova nga hatagan kita sang balaan nga espiritu kag buligan nga mapalambo ang gugma. (Luc. 11:13; 1 Juan 5:14) Walay sapayan sang aton sekular nga edukasyon, eksperiensia sa kamatuoran, ukon mga abilidad, mahimo kita mangin maayo nga manunudlo sang Biblia paagi sa pagpakita sang gugma.