Jehovah’s Witnesses—Faith in Action, Part 1: Out of Darkness
Sa Biblia, ang kapawa naangot sa kamatuoran, samtang ang kadudulman sa kabutigan. (Sal. 43:3; Isa. 5:20) Ginsuguran ni Satanas ang kadudulman sa kalibutan sang ginlimbungan niya si Eva. Sang ulihi ang tanan nga katawhan nalikop na sang kadulom. (Bug. 12:9) Ang video nga Jehovah’s Witnesses—Faith in Action, Part 1: Out of Darkness nagasaysay kon paano ang espirituwal nga kapawa amat-amat nga naggua gikan sa kadudulman. (Isa. 60:1, 2) Pagkatapos nga matan-aw ini nga video, sabta ini nga mga pamangkot.
(1) Paano ang tuman nga kadulom nagluntad sang mapatay ang mga apostoles? (2) Sugod sang katuigan 1100, ano ang nakabulig sa mga tawo nga makita nga ang mga simbahan wala nagatudlo sang kamatuoran? (3) Sin-o si Henry Grew kag si George Storrs? (4) Ano nga mga hitabo sa kabuhi ni Charles Russell ang may daku nga epekto sa iya? (5) Paano gintun-an ni Utod Russell, sang iya amay, kag sang pila niya ka kaupod ang Biblia, kag ano ang nahimo nila nga konklusion pasad sa Kasulatan? (6) Ngaa nakig-upod sila sa grupo ni Nelson Barbour, pero ngaa nagsipak sila sang ulihi? (7) Ano ang natabo sang Hulyo 1879 nga nagsugod sang bag-o nga panag-on sang espirituwal nga kapawa? (8) Pagkatapos sini, ano ang ginhimo sang nagadamo nga Estudyante sang Biblia para ipalapnag ang maayong balita? (9) Ano ang madugay na nga ginapaabot sang mga Estudyante sang Biblia nga matabo sa 1914? (10) Ano nga mga kabudlayan ang gin-atubang sang mga Estudyante sang Biblia sang napatay si Utod Russell? (11) Ano ang ginhimo sang mga Estudyante sang Biblia pagkatapos nga mahilway si Utod Rutherford kag ang iya mga kaupod? (12) Paano ini nga video nagpabakod sang imo apresasyon sa organisasyon ni Jehova? (13) Paano ini nga video nagpabakod sang imo determinasyon nga padayon nga magbantala sing makugi bisan pa may mga kabudlayan? (14) Paano naton magamit ini nga video para buligan ang aton mga paryente, ginatun-an sa Biblia, kag iban pa?
Hamili gid nga palanublion ang ginbilin sa aton sadtong mga Estudyante sang Biblia! Sa sadtong madulom sa espirituwal nga kalibutan, nangin maisog sila kag makugi nga mga manugdala sang kapawa. Kabay nga ilugon naton ang ila halimbawa kag ‘padayon nga maglakat subong mga anak sang kapawa.’—Efe. 5:8.