Mangin Mainandamon sa Ministeryo
1. Ngaa kinahanglan gid nga mangin mainandamon kon nagaministeryo?
1 “Subong sang mga karnero sa tunga sang mga lobo,” ang mga alagad sang Dios nagabantala sa “tunga sang tiko kag balingag nga kaliwatan.” (Mat. 10:16; Fil. 2:15) Ang lapnag nga mga report parte sa sibil nga kinagamo, ilinaway, kag pagpangidnap nagapakita nga ang mga malaut “magalain kag magalain pa.” (2 Tim. 3:13) Ano nga mga prinsipio sa Kasulatan ang makabulig sa aton nga “mangin mainandamon” sa aton ministeryo?—Mat. 10:16.
2. Sa ano nga mga kahimtangan maalamon nga maghalin sa teritoryo kag magbantala sa lain nga lugar?
2 Mangin Maalamon: Ginapadaku sang Hulubaton 22:3 nga maalamon nga ‘magpanago’ ukon maglikaw sa katalagman. Ang mga kahimtangan sa aton palibot nagabag-obag-o, gani dapat kita mangin alisto pirme! Halimbawa, natalupangdan mo nga may mga pulis kag nagatinumpok nga tawo sa dalan. Dayon ginpaandaman ka sang isa ka tagbalay. Sa baylo nga mangusisa, mas maalamon nga maghalin gilayon kag magbantala sa lain nga lugar.—Hulu. 17:14; Juan 8:59; 1 Tes. 4:11.
3. Paano maaplikar sa aton ministeryo ang prinsipio sa Manugwali 4:9?
3 Manghikot sing Ululupod: “Ang duha maayo pa sa isa,” siling sang Manugwali 4:9. Kon naanad ka nga isahanon nga nagabantala, praktikal pa bala nga himuon ini subong? Puede ini sa iban nga lugar. Pero may mga lugar nga kon sirom na, indi praktikal nga magpamalaybalay ang isa ka sister ukon isa ka pamatan-on. Napamatud-an na nga maayo gid kon may upod kita. (Manug. 4:10, 12) Dapat bantayan mo man ang iban nga miembro sang inyo grupo. Pahibalua man ang iban kon mahalin ka na sa teritoryo.
4. Ano ang aton himuon agod maproteksionan ang tanan sa kongregasyon?
4 Subong mga ‘manugbantay sang aton kalag,’ responsibilidad sang mga gulang nga maghatag sing praktikal nga mga panuytoy suno sa lokal nga mga kahimtangan. (Heb. 13:17) Pakamaayuhon gid kita ni Jehova kon nagapasakop kita kag nagakooperar sa ila. (Miq. 6:8; 1 Cor. 10:12) Kabay nga ang tanan nga alagad sang Dios mangin mainandamon samtang padayon nga nagapanaksi sing epektibo.