Dose ka Rason Kon Ngaa Nagabantala Kita

Ngaa nagabantala kita kag nagtudlo sing maayong balita? Bangod luyag naton buligan ang mga tawo nga bunayag sing tagipusuon nga maglakat sa dalan nga nagapadulong sa kabuhi. (Mat. 7:14) Amo ini ang una nga rason nga ginlista, pero indi ini ang panguna nga rason. Sa banta mo diin sa 12 ang pinakaimportante nga rason kon ngaa nagapakigbahin kita sa ministeryo?

1. Nagaluwas ini sang kabuhi.—Juan 17:3.

2. Nagapaandam ini sa mga malauton.—Ezeq. 3:18, 19.

3. Bahin ini sang katumanan sang tagna sa Biblia.—Mat. 24:14.

4. Pamatuod ini sang pagkamatarong sang Dios. Indi gid mabasol si Jehova kon laglagon niya ang mga malauton kay ginhatagan niya sila sing kahigayunan nga maghinulsol.—Binu. 17:30, 31; 1 Tim. 2:3, 4.

5. Pagtuman ini sang aton obligasyon nga buligan sa espirituwal ang mga tawo, nga ginbakal sang dugo ni Jesus.—Roma 1:14, 15.

6. Paagi sini malikawan naton ang salabton sa dugo.—Binu. 20:26, 27.

7. Kinahanglanon ini para sa aton kaluwasan.—Ezeq. 3:19; Roma 10:9, 10.

8. Nagapakita ini sang aton gugma sa aton isigkatawo.—Mat. 22:39.

9. Nagapakita ini sang aton pagkamatinumanon kay Jehova kag sa iya Anak.—Mat. 28:19, 20.

10. Bahin ini sang aton pagsimba.—Heb. 13:15.

11. Pagpakita ini sang aton gugma sa Dios.—1 Juan 5:3.

12. Nagapakabalaan ini sang ngalan ni Jehova.—Isa. 43:10-12; Mat. 6:9.

Siempre pa, indi lang ini ang mga rason kon ngaa nagapakigbahin kita sa ministeryo. Halimbawa, ang pagbantala nagapabakod sang aton pagtuo kag nagahatag sa aton sing pinasahi nga kahigayunan nga mangin masigkamanugpangabudlay sang Dios. (1 Cor. 3:9) Pero, ang pinakaimportante nga rason amo ang ginsambit sa numero 12. Gani mamati man sa aton ang mga tawo ukon indi, ang pagpakigbahin naton sa ministeryo nagapakabalaan sa ngalan ni Jehova kag nagasabat sa nagapakahuya sa iya. (Hulu. 27:11) Busa, may rason gid kita nga ‘indi mag-untat sa pagpanudlo kag sa pagbantala sing maayong balita.’—Binu. 5:42.