Bag-o nga Desinyo sang mga Tract!
1. Ano nga galamiton sa ministeryo ang may bag-o nga desinyo?
1 Lima ka tract ang ginpagua sang 2013 “Ang Pulong sang Dios Kamatuoran!” Distrito nga mga Kombension. Luwas sini, ang Kingdom News Num. 38, nga natig-uluhan “Mabuhi Pa Bala ang mga Patay?” gindugang sa sina nga mga tract. Ining anom ka tract may bag-o nga desinyo. Ngaa bag-o ang pormat sini? Kon ginatanyag ini sa pagpamalaybalay, paano naton magamit sing maayo ang bag-o sini nga desinyo?
2. Ano ang katuyuan sang bag-o nga desinyo sang tract?
2 Ngaa Bag-o ang Desinyo?: Ang epektibo nga presentasyon sa pagpamalaybalay nagalakip sing apat ka tikang: (1) Maggamit sing makapahunahuna nga pamangkot para makasugod sa pag-istoryahanay. (2) Magbasa sing Biblia. (3) Magtanyag sing literatura sa tagbalay. (4) Magbilin sing pamangkot kag maghimo sing kahimusan nga magbalik. Ang bag-o nga desinyo sang mga tract makabulig sa aton nga mahapos masunod ang apat ka tikang.
3. Paano naton matanyag ang bag-o nga tract sa ministeryo?
3 Paano Gamiton?: (1) Pagkatapos nga makapanamyaw, ipakita sa tagbalay ang makapainteres nga pamangkot sa atubang sang tract, kag pangayua nga iya opinyon. (2) Buksi ang tract, kag binagbinaga ang “Ano ang Ginasiling sang Biblia?” Basaha ang teksto sa Biblia kon ginatugot sang kahimtangan. Kon may tion ang tagbalay, binagbinaga ang “Ano ang Kahulugan Sini Para sa Imo?” (3) Itanyag ang tract, kag palig-una sia nga basahon ini. (4) Antes ka maghalin, ipakita sa iya ang “Binagbinaga” sa likod sang tract kag maghimo sing kahimusan para binagbinagon ang sabat sang Biblia sa masunod nga pagbalik.
4. Kon interesado ang tagbalay, ano ang himuon naton sa pagduaw liwat?
4 Mahapos man ang pagduaw liwat. Gamita ang ginsambit nga mga kasulatan sa likod sang tract agod masabat ang pamangkot nga imo ginpautwas sang nagligad. Antes ka maghalin, itudlo sa tagbalay ang piktyur sang Maayong Balita nga brosyur, dayon ipakita sa iya ang brosyur kag ang leksion nga nagaunod sing dugang nga impormasyon parte sa topiko, kag itanyag ini. Kon batunon niya, maghimo sing kahimusan nga binagbinagon ang brosyur sa masunod nga pagbalik. Nakasugod ka na sing pagtuon sa Biblia! Ukon sa baylo nga itanyag ang brosyur, mahimo mo itanyag ang lain nga tract kag maghimo sing kahimusan nga binagbinagon ini pagbalik mo.
5. Ngaa mapuslanon gid ang mga tract sa aton ministeryo?
5 Ang mga tract ginagamit sa aton ministeryo sa sulod na sang 130 ka tuig. Bisan pa lainlain ang kadakuon kag pormat sini, nangin epektibo gid ini nga galamiton sa pagpanaksi. Kabay nga gamiton naton sing maayo ining bag-o nga desinyo sa padayon nga pagpalapnag sing ihibalo sa Biblia sa bug-os nga kalibutan.—Hulu. 15:7a.