Maghanda para sa Memoryal Upod ang Malipayon nga Tagipusuon
1. Ano nga kahigayunan ang ginahatag sa aton sang panag-on sang Memoryal?
1 Ang Memoryal sa Martes, Marso 26, isa ka pinasahi nga kahigayunan nga magkalipay kita sa ginhimo sang Dios para sa aton kaluwasan. (Isa. 61:10) Antes sini, ang kalipay makabulig sa aton nga makahanda sing maayo. Paano?
2. Ngaa nagahanda kita para sa Memoryal?
2 Paghanda Para sa Okasyon: Ang Panihapon sang Ginuo isa ka pinasahi pero simple nga okasyon. Bisan pa sini, kinahanglan ang pagplano para indi mawasi ang importante nga mga butang. (Hulu. 21:5) Dapat pilion ang oras kag nagakaigo nga lugar. Kinahanglan ipreparar ang mga emblema. Ang tilipunan dapat tinluan kag ihanda. Dapat handaan sing maayo sang humalambal ang iya bahin, kag dapat man organisahon ang mga manugserbe kag mga atendant. Ayhan nahimo na ninyo ang pila sini. Nagahanda kita sing maayo bilang pagpasalamat sa nagaluwas nga gahom sang gawad.—1 Ped. 1:8, 9.
3. Paano naton mahanda ang aton tagipusuon para sa Memoryal?
3 Paghanda sang Tagipusuon: Importante man nga ihanda naton ang aton tagipusuon agod mahangpan sing bug-os ang kahulugan sang Memoryal. (Esd. 7:10) Gani, dapat magpain kita sing tion para binagbinagon ang naiskedyul nga pagbasa sang Biblia para sa Memoryal kag pamalandungan ang katapusan nga mga adlaw sang kabuhi ni Jesus sa duta. Ang pagpamalandong sa pagkamasinakripisyuhon ni Jesus magapahulag sa aton nga ilugon sia.—Gal. 2:20.
4. Ano nga benepisyo sang gawad ang nagahatag sa imo sing daku nga kalipay?
4 Ang kamatayon ni Cristo nagabindikar sang pagkasoberano ni Jehova. Nagahilway ini sa aton gikan sa sala kag kamatayon. (1 Juan 2:2) Nagabukas ini sang kahigayunan nga matigayon ang maayo nga kaangtanan sa Dios kag ang kabuhi nga walay katapusan. (Col. 1:21, 22) Nagabulig man ini sa aton nga matuman ang aton dedikasyon kay Jehova kag mangin mainunungon nga disipulo ni Cristo. (Mat. 16:24) Kabay nga madugangan ang imo kalipay samtang nagahanda ka sa pagtambong sa Memoryal!