Ang Pulong sang Dios Gamhanan
1. Ano ang tema sang adlaw sang pinasahi nga asembleya para sa 2014?
1 Indi kaangay sang bisan ano nga butang nga ginhimo sang di-himpit nga mga tawo, ang Biblia may gahom nga bag-uhon ang aton mga panghunahuna kag paggawi para mapahisuno ini sa kabubut-on ni Jehova. Pero daw ano kagamhanan ang Pulong sang Dios? Paano naton mapanginpuslan sing bug-os ang gahom sini sa aton kabuhi? Paano naton ini magamit sing mas epektibo sa pagbulig sa iban? Pat-od gid nga mapalig-on kita sa espirituwal samtang ginabinagbinag ini nga mga punto sa programa sang adlaw sang pinasahi nga asembleya para sa 2014. Ang tema sini nga “Ang Pulong sang Dios Gamhanan” ginkuha sa Hebreo 4:12.
2. Ano nga mga pamangkot ang pangitaan naton sing sabat?
2 Pamatii ang Sabat sa Masunod nga mga Pamangkot: Samtang nagapamati ka sa programa, isulat ang sabat sa masunod nga mga pamangkot.
• Ngaa makasalig kita sa Pulong ni Jehova? (Sal. 29:4)
• Paano naton maeksperiensiahan ang gahom sang Pulong sang Dios sa aton kabuhi? (Sal. 34:8)
• Paano mo magamit ang gahom sang Pulong sang Dios sa imo ministeryo? (2 Tim. 3:16, 17)
• Paano naton malikawan nga mabiktima sang madaya nga gahom sang kalibutan ni Satanas? (1 Juan 5:19)
• Paano ka magmadinalag-on sa espirituwal subong pamatan-on? (Jer. 17:7)
• Paano kita mangin mabaskog bisan pa maluya kita? (2 Cor. 12:10)
• Ano ang yabi sa padayon nga pagbag-o, bisan sa nanggamot nga mga batasan kag panimuot? (Efe. 4:23)
3. Magluwas sa pagpamati sa programa, paano pa gid kita makapanginpulos sa adlaw sang pinasahi nga asembleya?
3 Makabenepisyo gid kita sa pagpamati sining importante nga mga impormasyon! Isa pa ang adlaw sang pinasahi nga asembleya, pareho sang sirkito nga asembleya kag distrito nga kombension, magahatag sa aton sing kahigayunan nga magpasangkad kag makaupod ang mga kauturan sa iban nga kongregasyon. (Sal. 133:1-3; 2 Cor. 6:11-13) Gani maghinguyang sing tion upod sa imo madugay na nga mga abyan kag mangita man sing bag-o. Kon may nagaduaw nga humalambal, pareho sang manugtatap sang distrito ukon utod halin sa Bethel, abiabiha sia kag ang iya asawa. Madamo gid kita sing rason nga kalangkagan ang nagahilapit nga adlaw sang pinasahi nga asembleya!