Kon Paano Gamiton ang Sin-o ang Nagahimo sang Kabubut-on ni Jehova Subong?
Bag-o nga Brosyur nga Gindesinyo Para Giyahan ang mga Estudyante sa Biblia Padulong sa Organisasyon
1. Ano ang katuyuan sang brosyur nga Kabubut-on ni Jehova?
1 Nagamit mo na bala ang bag-o nga brosyur nga Sin-o ang Nagahimo sang Kabubut-on ni Jehova Subong? Katuyuan sini nga (1) mangin pamilyar ang mga estudyante sa Biblia sa mga Saksi ni Jehova, (2) buligan sila nga mahibaluan ang aton mga hilikuton, kag (3) makita nila kon paano nagapanghikot ang aton organisasyon. Ang brosyur nga Kabubut-on ni Jehova nagaunod sing isa lamang ka leksion sa kada pahina nga matuptupan sa sulod sang lima asta napulo ka minutos pagkatapos sang tagsa ka pagtuon.
2. Ipaathag ang desinyo kag kaundan sang brosyur.
2 Kon Paano Ini Gindesinyo: Ang brosyur natunga sa tatlo ka bahin, nga nagabinagbinag sa lainlain nga aspekto sang organisasyon ni Jehova. Ang tagsa ka tig-ulo sang 28 ka leksion yara sa porma nga pamangkot, kag ang madukot nga mga subtitulo nagasabat sa pamangkot. Ang mga laragway gikan sa sobra 50 ka pungsod ginngalanan para ipakita ang bug-os kalibutan nga kasangkaron sang aton hilikuton. Ang pila ka leksion may kahon nga “Ang Puede Mo Pa Himuon,” nga nagaunod sing panugda nga himuon sang imo estudyante.
3. Paano naton gamiton ang brosyur nga Kabubut-on ni Jehova?
3 Kon Paano Mo Ini Gamiton: Ipakita ang tig-ulo sang leksion kag ipamangkot ini. Dayon, samtang ginabasa ninyo ang leksion, ipadaku ang madukot nga mga subtitulo. Nian, binagbinaga ninyo ang repaso nga mga pamangkot sa katapusan sang pahina. Mahimo ninyo basahon ang bug-os nga leksion ukon basahon kag binagbinagon ang kada seksion. Pilia sing maayo ang mga teksto nga basahon. Indi pagkalimti ang mga laragway kag ang kahon nga “Ang Puede Mo Pa Himuon.” Mas maayo kon pasunod ang pagbinagbinag sang mga leksion. Pero, mahimo man magpili sang leksion nga nagakaigo sa kahimtangan. Halimbawa, kon malapit na lang ang inyo asembleya ukon kombension, mahimo ninyo binagbinagon gilayon ang leksion 11.
4. Ngaa nalipay ka bangod sa sining bag-o nga brosyur?
4 Paagi sa pagdumala sing pagtuon sa Biblia, ginabuligan naton ang aton estudyante nga makilala ang aton langitnon nga Amay. Pero dapat man naton sia tudluan parte sa organisasyon ni Jehova. (Hulu. 6:20) Nalipay gid kita nga mahapos na lang ini himuon bangod sa sining bag-o nga brosyur.