Gamita ang Aton Web Site sa Pagtudlo sa Inyo Kabataan
1. Ano ang katuyuan sang seksion sang aton Web site nga “Kabataan”?
1 Ang aton Web site nga jw.org gindesinyo para buyukon ang tanan nga tawo, bata man ukon tigulang. Ang seksion sini nga “Kabataan” (kadtui ang Panudlo sang Biblia > Kabataan) nagabulig sa mga bata kag sa ila mga ginikanan nga mangin suod sa isa kag isa kag kay Jehova. (Deut. 6:6, 7) Paano mo magamit ini nga seksion sa pagtudlo sa imo kabataan?
2. Paano ka makapili sing nagakaigo nga materyal nga gamiton mo sa pagtuon sa imo kabataan?
2 Mangin Mapasibusibuon: Lainlain ang kinahanglanon sang kada bata. (1 Cor. 13:11) Paano ka makapili sing nagakaigo nga materyal nga gamiton sa pagtuon sa imo kabataan? Pamangkuta ang imo kaugalingon: ‘Ano nga topiko ang makapainteres sa akon kabataan? Maintiendihan ayhan nila ini? Madali bala sila matak-an?’ Kon ang imo kabataan tatlo ka tuig ukon kubos pa, mahimo mo binagbinagon ang mga istorya sa “Ang Akon mga Leksion sa Biblia.” Ang iban nga pamilya nalipay sa mga sugilanon sang Biblia sa seksion nga “Tudlui ang Inyo Kabataan.” Binagbinaga man ang masunod nga mga opsyon.
3. Paano magamit sing epektibo sang mga ginikanan ang mga istorya kag hilimuon nga makita sa “Hilimuon sa Pangpamilya nga Pagsimba”?
3 Hilimuon sa Pangpamilya nga Pagsimba: Ini nga mga hilimuon makabulig sa ulo sang pamilya sa pagtuon sa ila kabataan. I-klik ang i-download, kag basaha ang “Instruksion sa mga Ginikanan” sa kada hilimuon agod mahibaluan mo kon paano gamiton ang mga istorya kag iban pa nga hilimuon. Gamita ang mga piktyur nga hampangan, pareho sang mga piktyur nga puede koloran, sa pagtudlo sa imo manghod nga mga bata. Buligi ang magulang nga mga bata sa hilimuon nga para sa pagtuon sang kabataan. Ang tanan nga hilimuon naangot sa pareho nga istorya ukon leksion sa Biblia, gani bisan ano man ang edad sang mga bata makapakigbahin sila sa pareho nga hilimuon sa pangpamilya nga pagsimba.
4. Ano ang makita sa seksion nga “Mangin Abyan ni Jehova”?
4 Mangin Abyan ni Jehova: Ang mga video, ambahanon, kag hilimuon sa sini nga seksion sang aton Web site makabulig sa mga ginikanan nga mapatudok ang Pulong sang Dios sa ila mga bata. (Deut. 31:12) Ang animated nga mga video nagatudlo sing importante nga leksion. May mga hampang nga nagapadaku sa sina nga leksion. Bangod nanamian magkanta ang mga bata—kag ang mga kanta nagabulig sa ila nga madumduman ang ila natun-an—regular nga gina-post ang mga ambahanon sang Ginharian kag mga kanta nga ginsulat para gid sa mga kabataan.
5. Ngaa dapat pangabayon sang mga ginikanan ang bulig ni Jehova sa pagtudlo sa ila kabataan sa kamatuoran?
5 Mga ginikanan, luyag ni Jehova nga mangin madinalag-on kamo subong mga iloy kag amay. Gani pangabaya ang iya bulig sa pagtudlo sa inyo kabataan sa kamatuoran. (Huk. 13:8) Paagi sa bulig ni Jehova, mahanas ninyo ang inyo kabataan nga mangin ‘maalam para sa kaluwasan paagi sa pagtuo may kaangtanan kay Cristo Jesus.’—2 Tim. 3:15; Hulu. 4:1-4.