Kalitan Mo Bala ang Kahigayunan?
Ipakita ang Pagkamapinasalamaton sa Panahon sang Memoryal
1. Ano ang aton pinasahi nga kahigayunan sa Memoryal?
1 Ang Memoryal sa Abril 14 nagahatag sing pinasahi nga kahigayunan nga palambuon kag ipakita ang aton pagpasalamat sa kaayo ni Jehova. Ang rekord sa Lucas 17:11-18 nagapakita nga importante gid para kay Jehova kag kay Jesus ang pagkamapinasalamaton. May kahigayunan ang napulo ka gin-ayo nga aruon nga magpasalamat, pero makapasubo nga isa lang sa ila naghimo sini. Paagi sa dulot nga gawad, ayuhon sa ulihi ang tanan naton nga balatian, kag mabuhi kita sing walay katapusan! Pat-od gid nga sa sina nga tion, pasalamatan naton si Jehova adlaw-adlaw sa sini nga mga pagpakamaayo. Pero paano naton mapakita ang aton pagpasalamat sa masunod nga mga semana?
2. Paano naton mapalambo ang apresasyon sa gawad?
2 Palambua ang Pagkamapinasalamaton: Ang pagbatyag sing pagkamapinasalamaton nagahalin sa aton hunahuna. Para mapalambo naton ang apresasyon sa gawad, may iskedyul sang pinasahi nga pagbasa sa Biblia sa Memoryal nga makita sa pila ka publikasyon, kaangay sa aton kalendaryo kag Pag-usisa sa Kasulatan Adlaw-adlaw. Mabinagbinag bala naton ini subong pamilya? Kon himuon naton ini, ang aton apresasyon sa gawad magalambo pa gid. Nian, may positibo ini nga epekto sa aton paggawi.—2 Cor. 5:14, 15; 1 Juan 4:11.
3. Sa ano nga mga paagi mapakita naton ang pagkamapinasalamaton sa panahon sang Memoryal?
3 Ipakita ang Pagkamapinasalamaton: Ang pagkamapinasalamaton mapakita paagi sa buhat. (Col. 3:15) Nanikasog gid ang aruon nga pangitaon si Jesus para magpasalamat. Pat-od man nga malipayon niya nga ginsugid sa iban ang iya milagruso nga pag-ayo. (Luc. 6:45) Mapahulag man bala kita sang aton apresasyon sa gawad nga makigbahin sing makugi sa kampanya sa pagpahibalo sang Memoryal? Ang pag-auxiliary payunir ukon pagdugang sing tion sa ministeryo sa panahon sang Memoryal maayo man nga paagi agod ipakita ang aton pagkamapinasalamaton. Dugang pa, mapakita man naton ini sa gab-i sang Memoryal paagi sa pag-abiabi sa mga bisita kag paghatag sing tion para sabton ang ila mga pamangkot.
4. Ano ang aton himuon agod wala kita sing hinulsulan pagkatapos sang Memoryal?
4 Amo na bala ini ang aton katapusan nga Memoryal? (1 Cor. 11:26) Wala kita kabalo. Pero nahibaluan naton nga kon matapos na ini, madula man ang pinasahi nga kahigayunan nga mapakita ang aton pagkamapinasalamaton. Gani, kalitan mo bala ini? Kabay nga ang aton mapinasalamaton nga bibig kag ang pagpamalandong sang aton tagipusuon mangin kalahamut-an kay Jehova, ang maalwan nga nag-aman sing gawad.—Sal. 19:14.