Pagpasalamat sa Pinakahamili nga Dulot sang Dios
1. Ngaa nagapasalamat gid kita kay Jehova?
1 Ang pinakahamili nga “dulot” gikan kay Jehova amo ang gawad nga gin-aman niya paagi sa iya pinalangga nga Anak. (Sant. 1:17) Nagresulta ini sa madamo nga pagpakamaayo, lakip na ang kapatawaran sang aton mga sala. (Efe. 1:7) Bangod sini, pirme kita nagapasalamat kay Jehova. Sa tion sang Memoryal, dapat gid kita maghinguyang sing tion sa pagpamalandong sining hamili nga dulot.
2. Paano naton kag sang aton pamilya mapalambo ang apresasyon sa gawad?
2 Pagpalambo sing Apresasyon: Sa mga semana antes sang Memoryal sa Marso 30, mahimo ninyo repasuhon ang impormasyon parte sa gawad sa tion sang inyo Pangpamilya nga Pagsimba agod mapalambo ang apresasyon sang imo pamilya. Subong pamilya, binagbinaga man kada adlaw ang pinasahi nga pagbasa sing Biblia sa tion sang Memoryal. Pamalandungi kon paano ka nakabenepisyo sa gawad kag kon paano ini nakaapektar sa imo pagtamod kay Jehova, sa imo kaugalingon, sa iban, kag sa palaabuton. Makabenepisyo ka man kon ensayuhon mo ang ambahanon numero 8 kag 109 nga gamiton sa Memoryal.—Sal. 77:12.
3. Paano naton mapakita ang aton apresasyon?
3 Pagpakita sing Apresasyon: Ang aton apresasyon sa gawad nagapahulag sa aton nga isugid sa iban ang parte kay Jehova kag sa iya daku nga gugma sa pagpadala sang iya Anak. (Sal. 145:2-7) Sa Marso, Abril, kag Mayo, ginapakita sang pila ka pamilya ang ila apresasyon paagi sa paghimo sing kahimusan nga makaauxiliary payunir ang bisan isa lang ka miembro sang ila pamilya. Kon indi ini mahimo, ‘makabakal ka bala sing tion’ agod madugangan ang imo pagpakigbahin sa ministeryo? (Efe. 5:16) Ginapahulag man kita sang aton apresasyon nga buligan ang iban nga makatambong sa Memoryal. (Bug. 22:17) Ilista ang imo mga ginabalik-duaw, mga estudyante sa Biblia, mga paryente, mga katrabaho, kag mga kaingod nga agdahon, kag makigbahin sing bug-os sa pagpanagtag sing imbitasyon para sa Memoryal.
4. Sa ano nga mga paagi magamit naton sing maalamon ang tion sang Memoryal?
4 Ang tion sang Memoryal nagahatag sa aton sing kahigayunan nga mapakita ang aton pagpasalamat sa dulot ni Jehova para sa katawhan. Kabay nga gamiton naton ini nga tion agod mapalambo kag mapakita ang aton apresasyon sa gawad kag sa tanan nga “di-matungkad nga kamanggaran ni Cristo.”—Efe. 3:8.