Dumduma ang mga Nagaistar sa Nursing Home
1. Ngaa kinahanglan bantalaan sing maayong balita ang mga nagaistar sa nursing home?
1 Madamo nga tawo ang nagaatubang sang kabudlayan bangod sa katigulangon. (Man. 12:1-7) Ang iban nga tigulang nagaistar sa mga nursing home, gani indi naton sila mabantalaan sa aton pagpamalaybalay. Nagakatabo ini bisan sa mga pungsod diin kinaandan na nga nagaistar ang mga tigulang sa ila kabataan ukon mga paryente. Bisan pa maluya na ukon mahina ang memorya, ang mga tigulang kag iban pa nga nagaistar sa nursing home mahimo gihapon makatuon parte kay Jehova, kag higugmaon sia. Paano naton mapaambit sa ila ang maayong balita sang “makalilipay nga paglaum”?—Tito 2:13.
2. Paano kita makahimo sing listahan sang mga nursing home nga bisitahon?
2 Pag-umpisa: Makahimo kita sing listahan sang mga nursing home paagi sa directory sang telepono ukon sa Internet. Pangitaa ang kategoriya subong sang “nursing homes,” “group homes,” kag “residential-care facilities.” Ang manugtatap sang pag-alagad magahimo sing kahimusan kon sin-o ang kalipikado nga manugbantala ang magabisita sa kada pasilidad. Paagi sa maayo nga pagplano kag pagsalig kay Jehova, posible gid nga makasugod sang grupo nga pagtuon sa Biblia.—Hulu. 21:5; 1 Juan 5:14, 15.
3, 4. (a) Sin-o ang dapat palapitan agod ilisensia ang grupo nga pagtuon? (b) Paano naton ipaathag ang kahimusan sang pagtuon?
3 Depende sa sahi sang pasilidad kon paano ilisensia ang kahimusan sang pagtuon. Sa dalagku nga mga pasilidad nga madamo ang nagaistar kag empleyado, mas maayo nga magpalapit sa receptionist kag mangabay nga istoryahon ang nagadumala. Sa magagmay nga mga pasilidad nga pila lang ang nagaistar, kag may duha ukon tatlo ka caregiver, mas maayo nga istoryahon sing direkta ang tag-iya.
4 Diin man sa duha, ipaathag nga nagaboluntaryo ka agod palig-unon ang mga tawo nga nanamian magbasa kag magtuon sing Biblia. Mamangkot kon may mga luyag magpakigbahin sa grupo nga pagtuon sa Biblia sa sulod sang mga 30 minutos kada semana. Madamo ka sing publikasyon nga magamit, pero natalupangdan sang iban nga madamo ang nanamian sang Ang Akon Libro sang mga Sugilanon sa Biblia kag Ang Pinakabantog nga Tawo nga Nagkabuhi. Mahimo mo ipakita ang mga publikasyon sa nagadumala. Mahimo mo ipresentar sa iya ang adlaw, oras, kag lugar nga hiwatan sang pagtuon kag ilakip ini sa ila listahan sang mga aktibidades sa nursing home. Indi mahadlok nga magpakilala bilang isa sa mga Saksi ni Jehova. Ipaathag man sa nagadumala nga indi ka maghiwat sing relihioso nga serbisyo kundi matudlo ka parte sa Biblia.
5. Ano ang praktikal nga mga suhestyon nga makabulig agod mangin makalilipay kag mapuslanon ang pagtuon?
5 Pagdumala sang Pagtuon: Bangod lainlain ang kahimtangan sang mga pasilidad mangin mapasibusibuon kag mahinantupon sa pagdumala sing pagtuon. Ang konduktor dapat magdala sing madamo nga publikasyon nga pagatun-an kag dapat niya ini tipunon pagkatapos sang pagtuon. Mahimo magdala sia sing mga kopya nga dalagku sing letra para sa iban. Subong sang kinaandan nga ginahimo, mahimo basahon ang parapo, dayon mamangkot, kag pasabton sila. Mahimo ipabasa ang mga parapo kag mga bersikulo sa Biblia sa mga gusto kag makasarang pa sa pagbasa. Sa tion sang pagtuon, mangin mapagsik, positibo, kag mainabyanon. Kon magpasugot ang nagadumala, mahimo magpasalida kon kaisa sing mga video sang organisasyon nga nagapabakod sang pagtuo sa Biblia kag nagapaathag sang mga leksion gikan sa partikular nga kasaysayan sa Biblia. Mahimo buksan kag tapuson paagi sa malip-ot nga pangamuyo ang pagtuon. Ginagamit man sang pila ka manugbantala ang mga ambahanon sang Ginharian.
6. Ano ang himuon kon may isa nga indi ugyon?
6 Ano abi kon may isa nga indi ugyon sa ginbasa ukon ginhambal sa tion sang pagtuon? Mangin mahinantupon sa pagsabat. (Col. 4:6) Mahimo ka magbasa sing isa ka malip-ot nga teksto nga nagapaathag sini. Kon indi ini praktikal, pasalamati ang iya komento kag istoryahi ninyo ini nga duha pagkatapos sang pagtuon.
7. Ano ang himuon mo kon may mamangkot ukon gusto magtuon sing dugang pa?
7 Kon kaisa, may mamangkot ukon gusto magtuon sing dugang pa. Gingamit sang isa ka sister ini nga paagi: “Nami ina nga pamangkot. Pero bangod personal ina nga pamangkot, puede tapuson anay naton ang aton pagbasa? Istoryahan ta lang na karon.” Posible man nga maghiwat sing personal nga pagtuon sa Biblia sa isa ka interesado sa lain nga tion kag kahimtangan.
8. Paano ireport ang grupo nga pagtuon kag pagtuon sa mga indibiduwal?
8 Maayo nga amo gihapon nga mga Saksi ang magadumala sing grupo nga pagtuon sa pasilidad. Ang magaupod nga mga manugbantala mahimo man magreport sang oras. Kon regular na ang pagtuon, ang manugbantala nga nagadumala mahimo magreport sing isa ka pagduaw liwat sa kada pagtuon sa grupo kag isa ka pagtuon sa Biblia kada bulan. Ang mga pagtuon sa Biblia sa mga indibiduwal nga makasarang magtuon kag makahangop sang iya ginatun-an mahimo ireport sa kinaandan nga paagi.
9, 10. Ano nga mga kinaiya ang kinahanglanon sang mga nagapakigbahin sa sini nga hilikuton? Ipaathag.
9 Mangin Regular: Maayo nga magtalana sang espesipiko nga adlaw kag tion para sa grupo nga pagtuon. Ginapaabot sang mga nagaistar kag empleyado nga hiwaton ang pagtuon sing regular kag magasugod kag matapos sa gintalana nga oras. (Mat. 5:37) Gani tumana ang ginkasugtan, mangin organisado, kag maukod. Napamatud-an nga mas maayo kon duha ka kalipikado nga manugbantala ang magadumala sang grupo nga pagtuon. (Man. 4:9, 10) Sa dalagku nga mga pasilidad, mahimo kinahanglan ang mas madamo nga manugbantala.
10 Importante man nga mangin mainabyanon kag magpakita sing personal nga interes. (Fil. 2:4) Sa una nga pagduaw, pangilalaha ang tanan nga nagtambong. Isulat kag sauluha ang ila mga ngalan. Mabatyagan sang tanan nga ginaabiabi sila kag ginaapresyar kon mainayuhon ka kag mapailubon.
11. Paano mapakita sang nagadumala sa pagtuon ang pagtahod sa mga empleyado kag pamilya sang mga tigulang?
11 Importante man nga mangin matinahuron kag mainayuhon sa mga empleyado kag miembro sang pamilya sang mga tigulang. Kon nasugdan na ang pagtuon, indi maalamon nga islan ang tion ukon kahimusan kon wala ka nakalisensia sa nagadumala. Kon kaisa, pamangkuta ang nagadumala kon ano ang masiling niya parte sa pagtuon. Kon matabuan nga nagbisita ang mga miembro sang pamilya sa tion sang pagtuon, pangilalaha sila. Ipaathag sa ila ang katuyuan sang pagtuon sa Biblia. Pasaliga sila nga sinsero ka kag interesado sa miembro sang ila pamilya. Agdaha sila nga mamati sa pagtuon.
12, 13. Isaysay ang mga eksperiensia nga nagapakita sang mga benepisyo sang pagpanaksi sa mga nursing home.
12 Mga Resulta: Ang mga nagalakbay nga manugtatap kag mga kongregasyon nagreport sing makapalig-on nga mga resulta sa sini nga sahi sang pag-alagad. Sa isa ka nursing home, mga 20 ang nagtambong sa una nga pagtuon. Personal nga natun-an sa Biblia ang anom sa ila. Sang ulihi, ang isa sa ila nabawtismuhan. Sa isa naman ka nursing home, napahulag ang 85 anyos nga babayi nga magtambong sa lokal nga kongregasyon kag gusto na niya nga magpabawtismo. Sang nagdesisyon ang isa ka pasilidad nga pauntaton ang grupo nga pagtuon sang mga Saksi ni Jehova, nagreklamo ang mga tigulang sa nagadumala sang pasilidad! Sang ulihi, nasugdan liwat ang pagtuon, kag mga 25 asta 30 ang nagtambong.
13 Indi lamang ang mga nagaistar sa nursing home ang nagaapresyar sa gugma nga aton ginapakita. Bisan ang mga empleyado nagapamati ukon nagapakigbahin pa gani sa pagtuon. Ang aton pagpakita sing personal nga interes sa mga nagaistar sa nursing home nagresulta sa maayo nga panaksi sa komunidad. (1 Ped. 2:12) Sang nahibal-an niya kon ano ang katuyuan sang pagtuon, ang isa ka nagadumala sang pasilidad nagsiling: “Ngaa subong lang kamo? San-o kamo masugod?” Ang isa naman nagsiling: “Gusto ko irekomendar ini nga pagtuon sa tanan nga nursing home sa aton lugar. Libre lang ini nga ginahimo sang mga Saksi ni Jehova bilang bahin sang ila pagserbisyo sa komunidad.” Ang isa ka nursing home sa Hawaii naghatag sing Volunteer Service Award sa mga Saksi ni Jehova nga nagalaragway sa mga boluntaryo subong isa ka “hamili nga bahandi” sa mga nagaistar diri.
14. Ngaa dapat naton panikasugan nga buligan ang mga nagaistar sa nursing home?
14 Ang mga tigulang ginaagda ni Jehova nga dayawon sia. (Sal. 148:12, 13) Ini nga imbitasyon nagalakip sa mga nagaistar sa nursing home. May mga nursing home bala sa inyo teritoryo sa diin makabenepisyo ang mga tigulang kon makabati sila sang maayong balita? Sa bulig sang inyo mga gulang kag sang mga nagadumala sang nursing home, makahatag kita sing maayo nga panaksi sa mga nagaistar diri. Kon ginadumdom naton ang mga tigulang, ginailog naton si Jehova.—Sal. 71:9, 18.